Osy kúni jasandy ıntellektiniń kómegi arqyly nebir aqyldy kameralar shyǵyp jatyr. Biri adamnyń bet-álpetin taný arqyly qaýiptiń aldyn alsa, endi biri jol erejelerin buzǵandardy anyqtaıdy. Tańdanarlyǵy, bulardyń bári de adamnyń qatysýynsyz-aq júzege asady.
Jaqyn kúnderi Astana qalasynda dál osyndaı taǵy bir aqyldy júıe iske qosylmaq. Bul beınekameranyń ereksheligi qandaı deseńiz, ol qoǵamdyq kólikterde jol aqysyn tólemegenderdi, ıaǵnı «qoıandardy» lezde anyqtaı alady. «City Transportation Systems» jaýapkershiligi shekteýli seriktestigi «Astana qalasynyń qoǵamdyq kóligindegi beıneanalıtıka júıesi» atty ınnovasııalyq jobasyn engizbekshi. Bul júıeniń maqsaty – jolaýshylarǵa qyzmet kórsetý sapasyn jaqsartý, jolaqysyn tóleýden jaltaratyndar sanyn azaıtý, sondaı-aq qoǵamdyq kólikterdegi qaýipsizdikti arttyrý.
Jobanyń qanatqaqty kezeńi aıasynda 2 mamyrdan bastap №24 avtobýsynda naqty ýaqyt rejiminde derekterdi taldaıtyn beınekameralar, roýterler men borttyq kompıýter ornatylǵan. Ár esikke qarama-qarsy ornalasqan beınekameralar kirgen jolaýshylardy esepteıdi, sondaı-aq tólem derekterin salystyrady. Sodan soń aqparat jedel túrde «City Transportation Systems»-tiń kóliktik baqylaý departamentine joldanady.
Aıta keteıik, jańa beınebaqylaý iske qosylǵan kúnnen bastap bir ǵana avtobýstyń ózinde bıletsiz jol júrýdiń eki myńnan astam jaǵdaıy tirkelgen. Bul qanatqaqty joba bolǵandyqtan, jolaýshylarǵa aıyppul salynbaǵan.