Minseń at, shapsań júırik, qaıran dúldúl...

At sportynyń oblysta dás­túrli túrde ótetin bıylǵy ulttyq oıyn­dary tasqynnyń kesirinen jyldaǵydan keshteý bolyp otyr. Biraq «eshten kesh jaqsy» demek­shi, atústi oıyndaryn jaqsy kóretin halyq jarys bolǵan kúni ıppodromǵa bala-shaǵasymen birge kóp jınaldy. Bul kúni jorǵa jarys, jelisten jarys, alaman báıgelermen qatar «Qyz qýý», «Teńge alý» sııaqty ulttyq at sport­y oıyndary da kórsetildi.

Qyz-jigittiń qanyn qyzdyrǵan «Qyz qýýǵa» jastar qazaqtyń ulttyq kıimderimen shyqty. Bar­­lyq juptarda da jigitter de, qyzdar da dittegenine jetip, halyqty máz qyldy.  Qumar etken qyzdyń úlbiregen alqyzyl betinen súıip, jazasyn arqasymen kótergen jigittiń de qýanyshy bir bólek...

Jeti myń metrlik jorǵa jarysynda aǵaıyndy Artem men Evgenıı Chıbısovter birinshi,  ekin­shi oryndy oljalady. Olardyń asyl tuqymdy «Akvamarın» men «Prognoz» atty sáıgúlikterine quıryq tistese otyryp, úshinshi bolyp márege Álııa Toqtasynova óziniń «Fıalka» atty júırigimen jetti. Jarys barysynda onyń júırigi eki jigitten keıde ozyp otyr­ǵanymen márege tájirıbesi mol­daý jigitter alda keldi. 

Jelgirlerdiń jeldeı esken jelisinde Áýez, Ábdikárim, Áb­di- ý­álı Nurahmetovterdiń júı­rikteri bas­qalardy shań qaptyryp ketti. Mı­haıl Skopsev pen Vasılıı Tka­chýktyń jelgirleri kóp artta qaldy.

Jarystyń eń úlkeni de, shoq­tyǵy bıigi de alaman ǵoı. Kópshilik sony tosyp, degbirsizdenip turdy. Sonymen 13 shaqyrymǵa sozylǵan alaman da bastaldy. Qıqý men aıǵaıdyń kókesi endi boldy. Jandarynan zýlaǵan júırikter ótkende delebesi qozbaǵan adam joq shyǵar. Júırikterdiń bári de oıqastatyp, kósile shaýyp barady, birinen-biri ótedi. Biraq júzden júırik, myńnan tulpar ǵana ozady emes pe, aqyrynda Sá­lim Ábilmansurdyń «Qarageri» máre syzyǵyn birinshi bolyp buz­dy. Máreden ekinshi bolyp «Fa­vorıt» degen júırigimen Rym­han Nurtileý ótti. Úshinshi oryndy Bıjuma Tilekbergen aldy. Sóıtip, qyzyljarlyqtardyń qanyn bir qyzdyryp, rýhyn bir kóterip qyzyqty da, qylyqty da Ulttyq at oıyndary da óz máresine jetti. 

Soltústik Qazaqstan oblysy