Premer-mınıstrdiń orynbasary Qanat Bozymbaev sý tasqynyn boljaý men modeldeýdiń aqparattyq júıesin ázirleý boıynsha keńes ótkizdi. Keńeske Sý resýrstary jáne ırrıgasııa, Sıfrlyq damý, ınnovasııalar jáne aeroǵarysh ónerkásibi, Tótenshe jaǵdaılar, Ekologııa jáne tabıǵı resýrstar, Qarjy vıse-mınıstrleri qatysty.
Aqparattyq júıege tórt modýl kiredi: derekterdi jınaý, taldaý, boljaý jáne modeldeý. Ol «Qazaqstan Ǵarysh Sapary», «Qazgıdromet», «Ulttyq geodezııa jáne keńistiktik aqparat ortalyǵynyń» jedel jáne kópjyldyq derekterin paıdalanady.
Sondaı-aq júıe sý tasqyny, sel, kóshkin qaýpi bar ýchaskeler men gıdrotehnıkalyq qurylystar boıynsha TJM derekter bazasymen biriktiriledi.
Sıfrlyq damý, ınnovasııalar jáne aeroǵarysh ónerkásibi mınıstrligi eýropalyq Jerdi qashyqtan zondtaý baǵdarlamasyn qoldanýdy usyndy. Sonymen qatar vıse-premer otandyq sıfrlyq sheshimderdi qarastyrýdy tapsyrdy.
Buǵan qosa, aýqymdy derekter kózin qalyptastyrý úshin vıse-premer gıdro jáne meteopostardyń sanyn kóbeıtýdi, sý aıdyndary men ózenderdiń batımetrııasyn júrgizýdi, sondaı-aq sý tasqyny qubylystary jıi bolatyny eldi mekenderdiń «sıfrlyq relefin» qurýdy tapsyrdy.