Atyraý oblysynda «Jasyl el» eńbek jasaǵynyń jańa maýsymy bastaldy. Qazir bul jobamen alǵashqy lekte 300-den astam jas jumys istep júr.
Oblystyq ishki saıasat basqarmasynyń bas mamany Áıgerim Qurmanberlıevanyń aıtýynsha, bıyl «Jasyl el» baǵdarlamasyna qatysý úshin 1 myń 700 jastan ótinish túsken. Onyń ishinde 1 myń jas iriktelip alynǵan.
«Bıyl tabıǵı sıpattaǵy tótenshe jaǵdaıǵa baılanysty «Jasyl el» jastar jasaǵynyń kezekti eńbek maýsymyn 12 maýsymda bastaý uıǵaryldy. Oǵan 16 men 35 jas aralyǵyndaǵy 1 myń jas qatysady. Bul joba Atyraý qalasynyń aýmaǵyndaǵy 6 aýyldyq okrýg pen 7 aýdanda iske asyrylady. Jumyspen qamtylǵan jastar kógaldandyrý, abattandyrý baǵytyna qosa qurylys salasynda jumys isteıdi. Máselen, Jylyoı aýdanynan 140 jas sý tasqynynan zardap shekkenderge salynyp jatqan turǵyn úı qurylysyna jáne kógaldandyrý jumystaryna tartylady», deıdi Áıgerim Qurmanberlıeva.
Onyń deregine súıensek, bıyl oblys bıýdjetinen «Jasyl el» jobasyna 110 mln teńgege jýyq qarjy bólinip otyr. Bul qarjy uıymdastyrýshylar men jumysqa tartylǵan jastardyń jalaqysyn tóleýge, túrli aksııa men senbilik ótkizýge, arnaıy kıim men túrli qural-saıman alýǵa jumsalady. Al qurylys salasynda jumysqa tartylǵan jastarǵa beriletin jalaqy – 85 myń teńge. Buǵan qosymsha qurylys kompanııalary tarapynan jastarǵa dál osyndaı kólemde qarjy tólenedi.
Atyraý oblysy