Taıaý kúnderi S.Asfendııarov atyndaǵy Qazaq ulttyq medısına ýnıversıtetiniń ujymy Medısına qyzmetkerleri kúnin erekshe atap ótip, 3578 metr bıiktiktegi Dárigerler shyńyna týrıst-alpınıster aıaldaıtyn sáki ornatyp qaıtty.
Almatynyń taýlaryndaǵy týrıstik oryndardy damytýdy kózdeıtin bul bastamaǵa S.Asfendııarov atyndaǵy Qazaq ulttyq medısına ýnıversıtetiniń rektory Marat Shoranovtyń ózi muryndyq bolyp, Dárigerler shyńyna salmaǵy ondaǵan kılo bolatyn oryndyqty jetkizý úshin alty shaqyrymnan astam joldy júrip ótti. Oryndyqqa QazUMÝ tuńǵysh rektory Sanjar Asfendııarovtyń týǵanyna 135 jyl tolýyna arnalǵan taqtaısha ilingen.
«Jastar arasynda salamatty ómir saltyn nasıhattaýǵa úlken kóńil bóletindikten, qyzmetkerlerimizben birge stýdentter de Dárigerler shyńyna shyqty. QazUMÝ memorıaldyq oryndyǵy osy shyńdy alǵash baǵyndyrǵan ýnıversıtet túlekterine qurmet belgisi retinde qalǵanyn qalaımyz. Taýǵa HH ǵasyrdyń 60-jyldarynan beri medısına salasynda qyzmet etip júrgen baıyrǵy jáne bolashaq dárigerler keldi. Týrısterge arnalǵan oryndyqtar ornatý chellendji jalǵasyn tapqanyn tileımiz», deıdi QazUMÝ rektory.
Al Almaty taýlaryndaǵy Dárigerler shyńy Gorelnık jotasynyń ortasynda, Gorelnık shatqaly men Kishi Almaty shatqalynyń sý aıryǵynda, Myńjylqy shyńynyń soltústiginde ornalasqan. Bul shyń óz ataýyn ótken ǵasyrdyń 60-jyldary, burynǵy Almaty memlekettik medısına ınstıtýtynyń alpınıster seksııasynyń stýdentteri baǵyndyrǵannan keıin ıemdengenin eske sala ketýge bolady.
Dárigerler shyńyna Shymbulaqtan birneshe shaqyrym jaıaý júrip otyryp, jetýge bolady. Jolaı Prıbornaıa men Myńjylky shyńdaryn baǵyndyrýǵa bolady. Osy shyńnyń jotasynan Tıtov kóliniń ǵajaıyp kórinisine kýá bola alasyz. Jaz mezgilinde atalǵan shyńnyń aınalasynan týrısterdiń aıaǵy úzilmeıdi, qysta shańǵy tebýge keledi. Tıtov muzdyq kólderi – Ile Alataýynyń eń kórikti jerleriniń biri bolsa, jyl, táýlik mezgilderine baılanysty sulýlyǵy qubylyp otyrady. Dárigerler shyńyna baratyn jolda Gorelnık sarqyramalaryna soǵa ketýge bolady.
Osylaısha, 94 jyl boıy otandyq medısınanyń maıtalmandaryn daıarlap kele jatqan Ulttyq medısınalyq ýnıversıtetinen 100 myńdaı dáriger túlep ushqan eken. Qazirgi tańda ýnıversıtette 15 553 stýdent bilim alyp jatsa, onyń ishinde 33 elden kelgen 2 879 sheteldik stýdent bar. Pedagogıkalyq ujym 1292 mamannan turady. Túlekterdiń jumysqa ornalasý deńgeıi 99,3 paıyzdy quraıdy.
ALMATY