Qasym-Jomart Toqaev pen Sı Szınpın BAQ ókilderi úshin brıfıng ótkizdi. Jıyn barysynda Qasym-Jomart Toqaev QHR Tóraǵasymen birge memleketter arasyndaǵy san qyrly yntymaqtastyqty bekemdeı beretinine nazar aýdaryp, búgingi kelissóz nátıjeleri sonyń aıqyn dáleli ekenin aıtty, dep jazady Egemen.kz Aqorda baspasóz qyzmetine silteme jasap.
«Qazaqstan men Qytaıdyń myzǵymas saıası qatynastary ózara senim men qoldaý rýhynda damyp kele jatyr. Eki el arasynda sheshimin tappaǵan eshqandaı túıtkil joq. Sondyqtan kúsh biriktire otyryp, saýda-ekonomıkalyq, ǵylymı-tehnıkalyq jáne mádenı-gýmanıtarlyq áriptestikti jandandyrýǵa nıettimiz. Biz Tóraǵa Sı Szınpın ekeýmiz jańa ǵana Birlesken málimdemege qol qoıdyq. Qujatta eki el qatynastarynyń jetistikteri jáne aldaǵy josparlary keńinen qamtylǵan. Qytaı – Qazaqstannyń basty saýda seriktesi. Byltyr elderimiz arasyndaǵy saýda kólemi 41 mıllıard dollar boldy. Aldaǵy ýaqytta taýar aınalymyn eseleı túsemiz. Buǵan áleýetimiz jetkilikti. Qytaı – bizdiń negizgi sheteldik ınvestorymyzdyń biri. Sońǵy 15 jylda bul elden Qazaqstanǵa 25 mıllıard dollarǵa jýyq ınvestısııa tartyldy», dedi Qasym-Jomart Toqaev.
Memleket basshysy byltyr Qazaqstan ekonomıkasyna quıylǵan qytaı ınvestısııasynyń kólemi 16 paıyzǵa ósip, 1,8 mıllıard dollarǵa jetkenin atap ótti. Bul kórsetkishti ulǵaıtýǵa eki tarap ta múddeli.
«Búginde quny 14,5 mıllıard dollar bolatyn 45 joba júzege asyrylyp jatyr. Jalpy Qytaı kapıtalynyń úlesi bar kásiporyndar sany 4700-den asady. Biz ózara tıimdi ınvestısııalyq jobalardy odan ári júzege asyrýdyń mańyzyn atap óttik. Naqtyraq aıtqanda, energetıka, ınfraqurylym, aýyl sharýashylyǵy, óndiris, qarjy, kólik, aeroǵarysh ónerkásibi jáne IT salalaryna toqtaldyq. Qazaqstan óz naryǵyna kirýge nıetti Qytaı kompanııalary úshin qolaıly jaǵdaı jasaýǵa daıyn», dedi Qazaqstan Prezıdenti.