Senat depýtaty Bıbigúl Jeksenbaı Astana qalasy máslıhatynyń tóraǵasymen jáne máslıhattyń turaqty komıssııalarynyń tóraǵalarymen kezdesti.
Bıbigúl Jeksenbaı Senat depýtaty retinde atqarylǵan jumystyń nátıjeleri jáne Palata maquldaǵan zańdar týraly aıtyp berdi. Ol sondaı-aq máslıhat depýtattarynyń osy saladaǵy mańyzdy róline de toqtaldy.
Kezdesý barysynda elordanyń respýblıkalyq deńgeıde sheshýdi talap etetin negizgi problemalyq máseleleri talqylandy. Senator olardy sheshý úshin birlesip jumys isteýge nıetti ekenin jetkizdi.
Júzdesý barysynda sondaı-aq jedel medısınalyq kómek jumysyndaǵy ózekti máseleler de kóterildi. Olardyń qatarynda shaqyrý boıynsha qyzmet etetin avtomashınalar men stansalardyń jáne qyzmetkerlerdiń jetispeıtini, jedel járdemge shaqyrýdyń kóptigi jáne medısınalyq kómek kórsetý tarıfiniń tómendigi de bar. Máslıhat tóraǵasy Erlan Qanalımov qalanyń árbir shaǵyn aýdanyndaǵy bir ǵımaratta ornalasqan biryńǵaı jedel qyzmet ortalyqtaryn ashýdy usyndy.
Kezdesý qorytyndysy boıynsha «Astana – jańa qala» arnaıy ekonomıkalyq aımaǵyna birlesip barý, sondaı-aq múlik ıeleri birlestikteriniń máseleleri boıynsha kezdesý ótkizý týraly sheshim qabyldandy. Sonymen qatar Astana qalasynyń máslıhaty ortalyq deńgeıde sheshimderdi talap etetin usynystar daıyndaýdy qolǵa alady. Bul usynystardyń barlyǵy Senat depýtaty Bıbigúl Jeksenbaıdyń atyna jiberiledi.