Prezıdenttiń Aqtóbe, Atyraý, Batys Qazaqstan jáne Mańǵystaý oblystarynyń áleýmettik-ekonomıkalyq damýynyń shuǵyl sharalar toptamasyn ázirleý jónindegi tapsyrmasyn oryndaý aıasynda vıse-premer Qanat Bozymbaev atalǵan tórt óńir ákimderiniń jáne barlyq mınıstrlik ókiliniń qatysýymen keńes ótkizdi.
Ulttyq ekonomıka mınıstrliginiń aǵymdaǵy ahýaldy taldaý derekteri boıynsha batystaǵy óńirler úshin syn-tegeýrin – munaı óndirýdiń tómendeýi jaǵdaıynda ekonomıkany ártaraptandyrý.
Degenmen batysta halyq sanynyń turaqty ósýi baıqalady. Boljamdarǵa sáıkes 2030 jylǵa deıin ondaǵy halyq sany 10%-ǵa – 3,1 mln-nan 3,4 mln adamǵa deıin ósedi. Bul úrdis jańa jumys oryndaryn qurý qajettiligin týǵyzady. 2024–2030 jyldar kezeńinde eńbek naryǵyna shamamen 138 myń adam shyǵady dep kútilip otyr. Premer-mınıstrdiń orynbasary olardy jumyspen qamtamasyz etý jóninde tıisti tapsyrmalar berdi.
Sonymen qatar keńes barysynda beıindi mınıstrlikter óz baǵyttary boıynsha, onyń ishinde óńirlik ınfraqurylymdy damytý boıynsha júrgizilip jatqan jumys týraly esep berdi. О́nerkásip jáne qurylys mınıstrliginiń derekteri boıynsha 2025 jylǵa deıin óńirlerdi sýmen qamtamasyz etý máselesi tolyǵymen sheshiledi. Qazirgi tańda káriz-tazartý qurylystary boıynsha jobalar iske asyrylyp jatyr.
Salalyq mınıstrlikter men ákimdikter qabyldap jatqan sharalarǵa qaramastan, osy baǵyttaǵy jumysty kúsheıtý qajettigi baıqalady.
Vıse-premer atap ótkendeı, sýmen qamtamasyz etýdi, sý burýdy, elektrmen jáne jylýmen jabdyqtaýdy qarjylandyrý, sondaı-aq óńirlerde jol salý máseleleri basym sıpatqa ıe bolýǵa tıis.
«Bizge Oral jáne Atyraý qalalarynyń áýejaılary úshin ashyq aspan mártebesin keńeıte otyryp, reıster sanyn ulǵaıtý qajet. Eń joǵary júkteme kezeńinde vagondardyń maýsymdyq tapshylyǵyn joıý, halyqaralyq áýejaılardy, temirjol vokzaldary men stansalardy jańǵyrtý qajet. Al aýyldyq joldardyń sapa deńgeıin 90%-ǵa deıin jetkizý kerek», dep tapsyrdy vıse-premer.
Sondaı-aq Qanat Bozymbaev batys óńirlerdegi ekologııalyq problemalardy sheshýge erekshe nazar aýdarýdy tapsyrdy. Densaýlyq saqtaý salasynda suranysqa ıe mamandar úshin turǵyn úıge jeńildikpen nesıe berýdiń óńirlik baǵdarlamasyn ázirleý tapsyryldy.
«Memlekettik organdar men ákimdikterge problemalardy jedel jáne sapaly sheshý úshin júıeli sharalar men jańa bastamalar boıynsha naqty usynystar berýdi tapsyramyn. Biz elimizdiń batys óńiriniń turǵyndarynyń ál-aýqatyn jaqsartý úshin bir aı ishinde shuǵyl sharalar toptamasyn ázirleýimiz kerek», dedi Q.Bozymbaev.