Ál-Farabı atyndaǵy Qazaq ulttyq ýnıversıtetiniń ǵalymdary eginshilik pen jaıylymdyq jerdi paıdalanýdyń ǵylymı negizin basshylyqqa alyp, dala zertteýlerin júrgizdi.
«Aýyldyq jerlerdi turaqty damytýdy qamtamasyz etý úshin elimizdiń ońtústik óńirlerinde shóleıttený úrdisiniń aldyn alýda tabıǵı-aýylsharýashylyq júıelerin ornyqty basqarýdy ǵylymı-qoldanbaly negizdeý» baǵdarlamasyna qatysty ǵylymı zertteý jumystarynyń sheńberinde Geografııa, jerge ornalastyrý jáne kadastr, Kartografııa jáne geoınformatıka, Bıoalýantúrlilik jáne bıologııalyq resýrstar kafedralarynyń professor-oqytýshylyq quramy, sonymen qatar Ǵaryshtyq tehnologııalar jáne Jerdi qashyqtyqtan zondtaý ortalyǵynyń qyzmetkerleri dalalyq ekspedısııaǵa qatysty.
«Dalalyq alqaptardyń shóleıttenýin baqylaý baǵdarlamasy klımattyń ózgerýimen kúresýge baǵyttalǵan Turaqty damýdyń ekojúıelerdi saqtaý tujyrymdaryn basshylyqqa alady. Ekspedısııa barysynda aýyl sharýashylyǵy jáne jaıylymdyq jerlerdi paıdalanýdyń qazirgi jaǵdaıy, shóleıttený saldary, sondaı-aq aýmaqtarǵa qatysty ǵylymı-qoldanbaly usynystar ázirlendi. Aýyl sharýashylyǵy men jaıylymdy paıdalaný úshin tabıǵı jáne antropogendik tabıǵı-aýylsharýashylyq júıelerin qamtıtyn barlyǵy 100-ge jýyq orynǵa baqylaý jasaldy», deıdi joba jetekshisi, PhD Sánim Bısenbaeva.
Dalalyq jumystardy júrgizý barysynda topyraq úlgileri jınaqtalyp, drondar arqyly tabıǵı-aýylsharýashylyq júıeleriniń jáne ósimdik jamylǵysynyń sıpattamasy jasalǵan. Keıbir baqylaý núktelerinde tabıǵı jáne jasandy taý jynystary zertteldi. Sonymen birge jerdi qashyqtyqtan zondtaý derekterimen salystyrý úshin baqylaý nysandarynda jetekshi fızıkalyq-geografııalyq jáne geomorfologııalyq úderister taldandy. Dalalyq aýmaqtardan jınalǵan derekter óńdelip, jınalǵan málimetterdiń bazasy túzilip, beıne jáne fotomaterıaldar qory jınaqtaldy.
ALMATY