Sadaqtyń eki ushyndaǵy adyrnanyń aýyzdyǵy kıgiziletin tustan bastap tobyrshyqtyń quıysqanyna deıin qatty múıiz, aǵash, súıek jasalyp, suǵyndyra qondyrylǵan bólikti «suǵyn» deıdi.
Suǵynnyń mindeti – sadaq atylǵanda oqqa serpin berý. Qazaqtyń «serpin berý», «suǵyn qadaý» deıtin turaqty tirkesteriniń astary osynda. Apa-ájelerimiz «Qudaıym til-suqtan saqtasyn» deıtini osy suq.
Suǵynnyń quramy: tumsyǵy, múıiz (aǵash) aýyzdyq, aýyzdyqqa bekitiletin adyrna tuzaǵy, suqtyń qobyly, qyrly qanaty, jigi bolyp bólinedi. Sondaı-aq kerilgen adyrna qatty urmas úshin adyrnanyń ıini men basynyń túıisken jerine, suǵynǵa qaptaldastyryp aǵash, súıek, múıizden jasalǵan qorǵaǵysh element qondyrylǵan. Ony «tobyrshyq» nemese «tobyq» dep ataǵan. Tobyqtyń (tobyrshyq) taǵy bir mindeti – oqtyń ushý qarqynyn jyldamdatý.