Premer-mınıstr Oljas Bektenov memlekettik qoldaý sharalarynyń tıimdiligin arttyrý arqyly elimizde ómir súrý sapasyn jaqsartý jóninde keńes ótkizdi. Jıynda «Otbasynyń sıfrlyq kartasyn» odan ári jetildirý máseleleri qaraldy, sondaı-aq «Áleýmettik ámııan», «Mektepke deıingi uıymdardy vaýcherlik qarjylandyrý» jobalary kórsetildi.
Úkimet basshysy turǵyndardyń ál-aýqatyn jaqsartý krıterııi boıynsha ákimderdiń naqty jumysyna KPI engizýdi tapsyrdy. Ol úshin «Otbasynyń sıfrlyq kartasy» platformasy negizinde shuǵyl jáne daǵdarys deńgeıinen qanaǵattanarlyq jáne baqýatty deńgeıge deıingi bes sanat boıynsha barlyq otbasynyń ál-aýqatyna turaqty monıtorıng pen taldaý júrgiziletin bolady. Otbasylardyń qanaǵattanarlyqsyz sanattan jaqsarýǵa kóshý dınamıkasyna jáne kerisinshe kórsetkishke baılanysty jergilikti atqarýshy organdardyń jumysy baǵalanady. «Otbasynyń sıfrlyq kartasynyń» qazirgi nátıjelerin BUU men jetekshi halyqaralyq ınstıtýttar oń baǵalap otyrǵan kórinedi.
Ákimderge bul quraldy orta jáne uzaqmerzimdi sharalardy josparlap, iske asyrý úshin qajetti negizgi nusqaýlyq retinde paıdalaný tapsyryldy. Muqtaj otbasylardyń ómirde qıyn jaǵdaıǵa tap bolý qaýpiniń aldyn alý maqsatynda, sondaı-aq kedeılikti, jumyssyzdyqty, halyqtyń jasyryn jumyspen qamtylýyn azaıtý úshin olardy belsendi túrde anyqtaý qajet. Úkimet basshysy óńir ákimderine ortalyq memlekettik organdarmen birlesip ár otbasymen jeke jumys júrgizýdi ári «daǵdarys» jáne «shuǵyl» sanattardaǵy otbasylardy jyl sońyna deıin 31,2 myń otbasyna deıin qysqartýdy qamtamasyz etýdi tapsyrdy.
«Memleket basshysynyń aldymyzǵa qoıǵan mindeti – elimizdegi ómir sapasyn jaqsartý. Tetik bar, memlekettik qoldaý sharalary jumys isteıdi, memleket qajetti qarajatty bóledi. Biz ákimderdiń halyq ál-aýqatyn jaqsartýǵa qosqan úlesin naqty baǵalaý krıterııine kóshemiz. Indıkatorlardyń oryndalý monıtorıngi turaqty bolady. Onlaın rejimde dınamıkany kórip, qorytyndy jasaımyz», dep atap ótti Oljas Bektenov.
Aıta ketý kerek, respýblıkalyq bıýdjettiń basym bóligi áleýmettik mindettemelerdi tolyq iske asyrýǵa, óńirlerdi damytýǵa baǵyttalǵan. Osyǵan baılanysty keńeste azamattarǵa memlekettik qoldaý sharalarynyń ýaqtyly kórsetilýin ári ashyqtyǵyn qamtamasyz etetin «Áleýmettik ámııan» jobasy qaraldy. Áleýmettik ámııan arqyly turǵyndarǵa pılottyq rejimde mektepterde tegin jáne jeńildikpen tamaqtaný, dári-dármek usynylady. Áleýmettik mańyzy bar azyq-túlik ónimderin satyp alýǵa, múgedektigi bar adamdar úshin ońaltýdyń tehnıkalyq quraldaryn satyp alýǵa ataýly kómek kórsetý jónindegi pılottyq jobany, sondaı-aq janar-jaǵarmaımen taýarly gazǵa baǵanyń ósýin óteý maqsatynda halyqtyń áleýmettik osal toptaryna arnalǵan vaýcherlerdi iske qosý qosymsha pysyqtalyp jatyr.
Úkimet basshysy memlekettik organdarǵa áleýmettik ámııanǵa jáne Sıfrlyq kartaǵa túsetin derekterdiń óz salasy men baǵyty boıynsha dáldigi men durystyǵyn qamtamasyz etýdi tapsyrdy. «Áleýmettik ámııan» jobasyn keńeıtý, zańnamaǵa tıisti ózgerister engizý máselelerin pysyqtaý tapsyryldy. Budan basqa, qarajatty maqsatty esepteýdi, onyń ishinde elektrondy aqsha men sıfrly teńge platformalaryn paıdalana otyryp pysyqtaý qajettigi atap ótildi.
Sondaı-aq bilim berý qyzmetterin kórsetý sapasyn arttyrýǵa baǵyttalǵan «Mektepke deıingi uıymdardy vaýcherlik qarjylandyrý» jobasy tanystyryldy. «Aqsha balanyń sońynan júredi» tujyrymdamasy memlekettik tapsyrys qarajaty ata-analardyń tańdaýynan keıin ǵana mektepke deıingi uıymdarǵa aýdarylatynyn bildiredi. Bul balabaqshalar arasynda bala úshin básekelestikti arttyrýǵa jáne sybaılas jemqorlyq táýekelderin azaıtýǵa múmkindik beredi. Oqý-aǵartý mınıstrligine Taraz jáne Shymkent qalalarynda vaýcherlik qarjylandyrý boıynsha pılottyq jobany aıaqtaý jáne ony 2025 jylǵy 1 qańtardan bastap búkil el boıynsha taratýdy qamtamasyz etý tapsyryldy.