Oral qalasynda balalar úıiniń tárbıelenýshilerine arnalǵan «Shańyraq» jasóspirimder úıi kúrdeli jóndeýden ótip, turǵyndarǵa qaıta berildi.
Balalar úıiniń tárbıelenýshileri ádette kámelet jasqa tolǵannan keıin qıyn jaǵdaıǵa tap bolady. О́ıtkeni jaqyn janashyry joq jas úlken ómirge qadam basqan kezde ómirdiń túrli qıyndyǵyna daıyn bolmaı qalýy múmkin. 2000 jyly Oral qalasynda ashylǵan «Shańyraq» jasóspirimder úıi balalar úıinen tárbıelenip shyqqan jastarǵa jaqsy múmkindik boldy. Biraq arada biraz jyl ótkende «Shańyraq» ǵımaraty ábden tozyp, kúrdeli jóndeýdi qajet etti. Ashylǵaly jibi túzý jóndeý kórmegen ǵımarattyń shatyry shurq tesik bolyp sý ketse, ortaq ájethana men ortaq as bólmesi de turǵyndarǵa jaısyzdyq týǵyzatyn.
О́tken jyly óńir basshysy Narıman Tóreǵalıev osy «Shańyraq» jasóspirimder úıiniń jumysymen tanysa kelip, ǵımarattyń jaǵdaıyn kózimen kórgen edi. Jataqhana turǵyndary eń aldymen nysanǵa kúrdeli jóndeý qajettigin aıtty. Jalpy, bul másele keıingi 10 jylǵa jýyq ýaqyt boıy kóterilgenimen, sheshimin tappaı júrgen eken. Oblys ákimi jergilikti bıýdjet qarajatynan 575 mln 974 myń teńge aqsha bólip, tozyǵy jetken nysanǵa byltyr kúzde jóndeý bastaldy. Ǵımarattyń ishi-syrtymen birge aınalasy da abattandyryldy. Osy ýaqyt ishinde oblys ákimi jóndeý jumysynyń sapasyn ózi baqylap otyrdy. Endi mine, ǵımarat sý jańa qalypqa enip, turǵyndarǵa esigin qaıta aıqara ashty.
– Byltyr osy qurylys bastalǵan kezde kelip, bári oıdaǵydaı bolatynyn aıtqan edim. Mine, biz ýádemizde turdyq. Áleýmettik osal toptaǵy azamattardy qoldaýdy jalǵastyra beremiz. Osynyń bári – ata-anasyz, jetim qalǵan balalarǵa jasalyp jatqan memleket qamqorlyǵy. Bul ǵımarat óte ońtaıly jerde ornalasqan. Orta mektep te, balabaqsha da jaqyn. Balalaryn mektepke, balabaqshaǵa berip, ata-analary alańsyz jumysyn isteıdi, – deıdi N.Tóreǵalıev.
Shynynda da alǵash ret 1958 jyly salynǵan nysan kúrdeli jóndeýden keıin sý jańa qalypqa engen. 106 adamǵa arnalǵan jataqhanada 74 turǵyn bólmesi bar. 3 qabatty ǵımaratty jóndeý isin merdiger «TasqalaTransGaz» JShS júrgizgen.
– Jóndeýge deıin tóbeden sý tamyp, esik-terezelerden jel ótetin edi. Qazir ǵımarat túgeldeı jańaryp qaldy. Jaryq, jyly, taza. Káriz júıesi de jóndeldi. Bári kóńilimizden shyqty, – deıdi jasóspirimder úıiniń turǵyny, kópbalaly ana Aıdana Tájibaeva.
«Shańyraq» jasóspirimder úıiniń dırektory О́mirbaı Qalymbetovtiń aıtýynsha, qazir munda balalar úıiniń 89 túlegi turyp jatyr eken. Sonyń ishinde 17 otbasy – jetim balalar úıiniń túlegi. Onyń 12-si – jalǵyzbasty analar. Qalǵany – jastar. Mundaǵy bólmeniń kóbi jalǵyz adamǵa arnalǵan. Al 24 bólme balaly otbasylarǵa arnalyp jabdyqtaldy. Ol jerde balaly otbasylar turyp jatyr. Kámeletke tolmaǵan balalardyń jalpy sany – 72.
Áý bastaǵy talap boıynsha «Shańyraq» úıinde tek jastar men jasóspirimder ǵana turýy kerek edi. Alaıda basqa barar jeri bolmaǵan balalar úıiniń burynǵy tárbıelenýshileri bul jerde uzaq turaqtap qalyp jatady. Qazirdiń ózinde munda jasy 50-den asyp ketken turǵyndar da bar. Olar «Shańyraq» úıiniń burynǵy jaǵdaıyn jaqsy biledi.
– Burynǵy jataqhanamyzdyń jaǵdaıy óte nashar, sasyq, taraqan qaptaǵan jaısyz edi. Tóbemizden sý ketetin, esik sańylaýynan jel kiretin. Qazir bári jaqsy. Túgeldeı jańalanǵan. Qalanyń jaıly páterinen aıyrmasy joq, – deıdi A.Tájibaeva.
Aıta keter jaıt, jasóspirimder úıiniń syrty da abattandyrylǵan. Balalarǵa arnalǵan oıyn alańy, jastarǵa vorkoýt sport alańy jasaqtalǵan. Keń avtoturaqqa arnaıy shlagbaým ornatylypty.
– Biz jataqhana turǵyndaryna arnap balalar oıyn alańyn da jasap berdik. 1 600 sharshy metr alańǵa avtokólik turaǵy men joldar jasaldy, órnektas tóseldi, – deıdi merdiger kompanııa basshysy Tilek Mahmetov.
Batys Qazaqstan oblysy