Búgin memlekettik bilim berý granttaryn taǵaıyndaý jónindegi respýblıkalyq komıssııa óz jumysyn aıaqtady. Bul týraly Ǵylym jáne joǵary bilim mınıstri Saıasat Nurbek habarlady, dep jazady Egemen.kz.
Grant ıegerleriniń tizimi 3 tamyz kúni, saǵat 11: 00-de jarııalanady.
«Sapaly jáne qajyrly qyzmeti úshin komıssııa múshelerine sheksiz alǵysymdy bildiremin! Ary qaraı talapkerlerdiń UBT-da jınaǵan baldaryna jáne bekitilgen erejelerge sáıkes konkýrstyq negizde bilim berý granttary taǵaıyndalatyn bolady.
Talapkerlerdiń basym bóliginiń tańdaýy «Pedagogıkalyq ǵylymdar», «Injenerlik, óńdeý jáne qurylys salalary» jáne «Aqparattyq-kommýnıkasııalyq tehnologııalar» baǵyttaryndaǵy mamandyqtarǵa tústi», dep jazdy mınıstr.
Talapkerler arasyndaǵy grant ıegerlerin anyqtaıtyn komıssııa quramynda Parlament depýtattary, memlekettik organdar, bilim salasy kásipodaqtarynyń, «Atameken» ulttyq kásipkerler palatasynyń, joǵarǵy oqý oryndary qaýymdastyǵynyń, qoǵamdyq uıymdardyń ókilderi jumys istegen.
Konkýrstyq irikteýdiń qorytyndysy Ǵylym jáne joǵary bilim mınıstrliginiń resmı saıtynda jáne Telegram arnasynda 3 tamyz kúni saǵat 11.00-de jarııalanady, sondaı-aq Ulttyq testileý ortalyǵynyń Telegram arnasy men stýdentterge arnalǵan aqparattyq anyqtamalyq portal mapp.kz saıtynda jarııalanady.
Al joǵary oqý oryndaryna qujattardy qabyldaý 25 tamyzda aıaqtalady.