Astana qalasynda shahmattan komandalyq álem chempıonaty máresine jetti. Birneshe kún boıy álemniń tańdaýly grossmeısterlerinen jasaqtalǵan 39 komanda (315 shahmatshy) «Freedom Holding Corp.» bas seriktes bolǵan oı dodasynyń kórigin qyzdyrdy.
«QazExpo» kongress ortalyǵynda ótken álemdik alamanda shahmatshylar rapıd jáne blısten saıysqa tústi. Rapıd boıynsha álemdik doda shveısarııalyq júıemen ótti. Al blıste 8 topqa bólingen komandalar aınalma júıede tartysty. Eki saıys ta alty taqtada órbip, ár komanda besinshi taqtada áıel shahmatshyny qossa, altynshy taqtada áýesqoı shahmatshy baǵyn synady.
Byltyr komandalyq álem chempıonaty Germanııanyń Dıýsseldorf qalasynda ótkeni belgili. Ol kezde tek rapıdten synǵa túsken shahmatshylar elorda tórinde blısten de oı jarystyrdy.
Álem chempıonatynyń rapıd synynda top jarǵan «Al-Ain ACMG UAE» komandasynda áıelder dýeti Katerına Lagno men Chjý Szıner tegeýrindi oıyn órnegin kórsetti. «Irandyq Kasparov» laqap atymen tanymal Parhama Magsýdlý, Danııl Dýbov, Vladıslav Artemev sekildi úzdikter jeńiske jetti. Rapıd saıysynda 23 upaıdyń 21-in oljalaǵan «Al-Ain ACMG UAE» komandasynyń shahmatshylary toǵyz matchta jeńiske jetip, úsh ret teń tústi.
Osy synda kúmis medal oljalaǵan «Decade China Team» komandasynda álem chempıondary Dın Lıjen men Szıýı Venszıýn baǵyn synady. Budan taǵy eki sýpergross Iýı Iаnı jáne qańtarda Nıderland elinde ótken Veık-an-Zeedegi týrnırinde álemniń úzdikterin jeńip, qarymyn baıqatqan Veı I syndy sańlaqtar dodaǵa qosyldy.
Doda bastalmaı-aq sáýegeıler byltyrǵy álem chempıony «WR Chess Team» komandasyna qyzdy-qyzdymen bas báıgeni baılap ta qoıǵan edi. Olaı ton pishýdiń de jóni bar. Sebebi komandaǵa álemniń birneshe dúrkin chempıony, dúnıejúzilik reıtıngtiń kóshin bastap turǵan norveg Magnýs Karlsen men áıelder arasynda shoqtyǵy bıik (álemdik reıtıngte 1-satyda tur) qytaılyq Hoý Ifan jetekshilik etti. Álemniń eks-chempıony Aleksandra Kostenıýk, Iаn Nepomnıashıı, dúnıejúzilik shahmat olımpıadasynyń chempıony Nodırbek Abdýsattorov, álem kýboginiń ıegeri Iаn-Kshıshtof Dýda, álem chempıonatynyń kúmis júldegeri Vınsent Keımer syndy úzdikter toptasty. Kil myqtyny mańyna jıǵan Magnýs Karlsenniń saıypqyrandaryna rapıd saıysynyń qola medali buıyrdy.
Biraq blıs dodasynda Karlsenniń komandasy minez tanytyp, qarsylastaryn qapy qaldyrdy. Eki kezeń qorytyndysynda bul komandanyń qarymyna eshkim tótep bere almady. «A» tobynan pleı-off kezeńine ótken Magnýs Karlsenniń komandasy 8/1 fınalda «Hunnu Air» komandasyn qapy qaldyryp, shırek fınaldyq tartysta «GMHans.com» oıynshylaryn jeńdi. Al jartylaı fınalda «Chessy» komandasynyń shahmatshylaryn eńserdi. «Chessy» komandasynda Vıdıt Santosh Gýdjratı, Rıhard Rapport, Alekseı Sarana, Iorden van Forest, Hampı Konerý, Anna Mýzychýk baq synady. Blısten fınaldyq saıys asa tartyspen órbidi. Reıtıngtegi kórsetkish boıynsha da qarsylastan mysy basym turǵan Magnýs Karlsen bastaǵan sańlaqtar Úndistannyń «Team MGD1» komandasyn da qapy qaldyrdy. Biraq jeńis ońaı kelgen joq, tipti Magnýs Karlsendi Ardjýn Erıgaısı jeńip, kópshilik kútpegen nátıje tirkegen. Biraq onyń komandasyndaǵy ózge grossmeısterler syn sátinde tabandylyq tanytyp, jeńiske jetti. Blıs dodasynyń qola medali «Al-Ain ACMG UAE» men «Chessy» komandasynyń múshelerine buıyrdy.
Astana qalasyn dúbirge bólegen dodanyń dýyna qosylǵan elimizdiń komandalary 10-14 satyǵa turaqtady. Biraq bul synǵa Tashkent qalasynda jasóspirimder arasyndaǵy álem chempıonatyna qatysyp jatqan álem chempıony Qazybek Nógerbek, Ámına Qaıyrbekova, Lııa Qurmanǵalıeva, Nazerke Nurǵalı, Aıaýlym Qaldarova, Zarına Nurǵalıeva sııaqty jas talanttar baq synaǵan joq. Deı turǵanmen «Kazshess» komandasynda talaı dodaǵa qosylyp ysylǵan, tájirıbeli Bıbisara Asaýbaeva (eki dúrkin álem chempıony), Álisher Súleımenov Aldııar Ańsat, Qazaqstan shahmat federasııasynyń birinshi vıse-prezıdenti Dármen Sádýaqasov, Shahrııar Mamedıarov, Aleksandr Grıshýk syndy úzdikter tartysqa tústi. Astana-1 komandasynda Qazaqstannyń birneshe dúrkin chempıondary Pavel Kosýr, Pıotr Kostenko, Nurlan Ybyraev, Denıs Mahnıov, Ramazan Jalmahanov, Arystanbek Orazaev, Jandos Aǵmanov, pen Merýert Kamalıdenova dodaǵa qosyldy. Úshinshi komanda Teniz Kazakhstan sapynda grossmeıster Ánýar Ismaǵambetov kapıtandyq mindetti atqaryp, qataryna 2023 jylǵy Azııa chempıondary Arystan Isanjolov pen Ksenııa Balabaeva, Edgar Mamedov, Saýat Nurǵalıev, Danııal Sápenov syndy úzdikterdi jınaǵanymen, júldege jete almady.
Komandalyq álem chempıonatynyń jalpy júlde qory – 350 myń eýro. Rapıdke – 250 myń eýro, blıske 100 myń eýro bólindi. Rapıd synynda jeńiske jetken komanda enshisine 100 myń eýro syıaqy jazylsa, blısten jeńiske jetken komanda múshelerine 40 myń eýro berildi. Kúmis, qola júldegerler de qomaqty syıaqyǵa keneldi.