Qaı óńirdiń de ósip-órkendeýi tıimdi jumys kúshiniń tıisti deńgeıde jetkilikti bolýymen tikeleı baılanysty. Bul rette maman tapshylyǵy qatty seziletin aımaqtarǵa belgili bir salada biliktiligi bar azamattardyń qonys aýdarýyna jaǵdaı jasaýdyń mańyzy zor. Osy maqsattan týǵan kóshte ilgerileý baıqalady.
Bıylǵy 1 shildedegi derekke súıensek, erikti qonys aýdarý aıasynda jumys kúshiniń utqyrlyǵyn arttyrý úshin biraz óńirge 4 869 adam kóship bardy. Bul qonystanýshylardyń 1 891-i shet memleketterden kelgen qandastarymyz ekenin atap ótken jón. Barlyq qonys aýdarýshyǵa memlekettik qoldaý sharalary kórsetildi. Osy baǵyttaǵy is-sharany ári qaraı qarqyndy jalǵastyryp, jyl sońyna deıin 9 483 adamdy kóshirý josparlanyp otyr.
Jumys kúshi tapshy óńirlerge ornalasý kórsetkishin keltirsek, Pavlodar oblysyna – 2 036 adam, Soltústik Qazaqstan oblysyna – 1 163 adam, Qostanaı oblysyna – 540 adam, Shyǵys Qazaqstan oblysyna – 402 adam, Abaı oblysyna – 362 adam, Aqmola oblysyna – 285 adam, Qaraǵandy oblysyna – 43 adam, Ulytaý oblysyna 38 adam qonys aýdardy.
Al qonystandyrý aımaqtaryna kóshken qandastarymyzdyń úles salmaǵyna toqtalsaq, О́zbekstannan – 631 adam, Mońǵolııadan – 616 adam, QHR-dan – 472 adam, Reseıden – 110 adam jáne basqa elderden 62 adam kelgen.
Sonymen, 1 491 eńbekke qabiletti qonys aýdarýshy men 944 qandastyń 1 288-i jumysqa ornalastyryldy, 111 adam kásipkerlik qyzmetpen aınalysady, 1 adam bıznes ashý úshin grant aldy. Qonys aýdarǵan azamattar densaýlyq saqtaý, aýyl sharýashylyǵy, bilim berý jáne ónerkásip salalaryna jumysqa turdy.
Osyndaı nıetpen jańa jerden oryn tepken otandasymyzdyń biri – Kópbaev otbasy. Abaı eline qonys aýdarǵan olar ómirinde oń ózgerister bolyp jatqanyn jetkizdi.
«Biz óńirlik qonys aýdarý kvotasyna 2024 jyly qosyldyq. Jetisý oblysynyń Taldyqorǵan qalasynan Abaı oblysynyń Aıagóz qalasyna kóship keldik», dedi Raýan Kópbaev.
Raýan I.Jansúgirov atyndaǵy Jetisý memlekettik ýnıversıtetin «Qarjy jáne nesıe» mamandyǵy boıynsha bitirgen. Jańa turǵylyqty jerine kelgennen keıin ol memlekettik mekemege bas býhgalter bolyp jumysqa ornalasty.
Raýannyń jubaıy buryn «Bastaý mektebi» JShS-de ofıs-menedjer bolyp jumys istegen eken, al qazir dekrettik demalysta. Ol «Bastaý bıznes» jobasy boıynsha kásipkerlik negizderine oqytýdan ótip, óziniń bıznes-jobasyn sátti qorǵady. О́z isin ashýdy kózdegen Kópbaev otbasy jazda jańa bıznes-ıdeıalardy iske asyrýǵa arnalǵan grant ıegeri atanyp, 1 mln 476 myń 800 teńge kóleminde qarjy aldy.
«Biz kópten beri bódene ósirý kásibin jolǵa qoıýdy oılastyryp júrgenbiz. Endi mine, oıymyz júzege asqaly otyr. Bólingen qarajatqa ınkýbator, brýder, aýa baptaǵysh, tońazytqysh, muzdatqysh jáne jeldetý júıesin satyp alǵaly otyrmyz. Biz memleket tarapynan osyndaı qoldaý sharalary kórsetilip jatqanyna dán rızamyz», dep Raýan aǵynan jaryldy.
Erikti qonys aýdarý aıasynda qonys aýdarýshylarǵa memlekettik qoldaýdyń birqatar sharasy usynylady. Atap aıtsaq, bul – otaǵasyna jáne otbasynyń árbir múshesine 70 AEK mólsherinde kóshýge arnalǵan birrettik sýbsıdııa; otbasy músheleri sany men eldi mekenge baılanysty 15-ten 30 AEK-ke deıingi mólsherde 12 aı ishinde turǵyn úı jaldaýǵa jáne kommýnaldyq qyzmetterge aqy tóleýge aı saıynǵy sýbsıdııalaý; qysqamerzimdi kásiptik oqytýǵa joldama; jumysqa ornalasýǵa nemese kásipkerlik bastamany damytýǵa járdemdesý; ekonomıkalyq utqyrlyq sertıfıkattaryn berý.
Buǵan qosa óńiraralyq qonys aýdarýǵa járdem kórsetetin jumys berýshilerge turǵyn úımen qamtamasyz etilgen jáne keminde 2 jyl merzimge turaqty jumysqa qabyldanǵan árbir qyzmetker úshin 400 AEK mólsherinde jumysqa ornalasýǵa birjolǵy sýbsıdııa beriledi.