Batys Qazaqstan oblysynda 28 mln tekshe metr sý jınaıtyn Jalpaqtal sý qoımasyn salý josparlandy. Bul 12 myńnan astam adamdy sýmen qamtamasyz etýge jáne lımandy sýarý alańyn 12 myń gektarǵa ulǵaıtýǵa múmkindik beredi, dep habarlaıdy Egemen.kz Sý resýrstary jáne ırrıgasııa mınıstrliginiń baspasóz qyzmetine silteme jasap.
Mınıstrliktiń habarlaýynsha, bul sý qoımasy óz kezeginde mal sharýashylyǵyna qajet jem-shóp ónimdiligin arttyrady.
Bıyl «Qazsýshar» fılıaly Batys Qazaqstan oblysynda 146 myń ga lıman men tabıǵı jaıylymdy sýarýǵa 562 mln tekshe metr sý jibergen.
Búginde mekeme tutynýshylarmen sý berý týraly 210 kelisimshart jasasqan, onyń 197-si jergilikti sharýalar. Aýyl sharýashylyǵynyń qajettilikteri úshin kásiporyn 15,8 mln tekshe metr, al sanıtarlyq-ekologııalyq is-sharalarǵa 22,9 mln tekshe metr sý jibergeni belgili boldy.
«BQO boıynsha «Qazsýshar» fılıaly 13 gıdrotehnıkalyq qurylysty jóndep, Kırov sý qoımasyn rekonstrýksııalaý jumysyn júrgizdi. Sondaı-aq, Shaǵan ózeni, Kóshim magıstraldyq arnasy men 67,6 shaqyrym kanaldy mehanıkalyq ádispen tazalady», dedi BQO boıynsha «Qazsýshar» fılıaly dırektorynyń mindetin atqarýshy Raýan Hýsaınov.