Zerger Abzal Moldabek esimin áleýmettik jeli arqyly jurt jaqsy tanıdy. Ár jumysyna erekshe den qoıatyn, ásemdikpen qatar mazmunǵa aıryqsha mán beretin sheber. Muny onyń ár týyndysynan baıqaýǵa bolady. Jumys barysynan áleýmettik jelige salǵan jazbalary da sony ańǵartady. Tipti keıde «Myna áshekeıdi jasap bolǵan soń, satýǵa qımaı qaldym», deıdi. Ár áshekeıine taýar dep emes, óner týyndysy dep qaraıtyn zergerdiń mazmundy týyndylary da osynysymen suranysqa ıe.
Jýyrda «Esentai Gallery» zalynda zerger Abzal Moldabektiń kórmesi ótti. Sheber kórmede onjyldyq jumysyn qorytyndylap, «Alash Jewels» brendiniń barlyq eńbekteri men «Qarlyǵash» atty jańa toptamasyn tanystyrdy.
Júzden asa dızaın, áshekeı qoıylǵan kórmeni daıyndaýǵa úsh aı ýaqyt ketken. Al jańa toptamany jasaýǵa bir jyl ýaqyt jumsapty. Avtordyń alǵashqy kórmesine Fransııa, Shveısarııa, Reseı, elimizdiń birneshe qalasynan turaqty tutynýshylary arnaıy kelgen.
«Áleýmettik jelige áshekeıdiń sýretin sala salǵanmen, onyń qundylyǵy, artynda qandaı oı men eńbek jatqany kórinbeı qalady. Sondyqtan arnaıy kórme ótkizip, jaqsylap tanystyraıyn dep sheshtim», deıdi Abzal jańa toptamasynyń tusaýyn kesip jatyp.
«Zergerlikke kásip retinde áli kirisken joqpyn. Qazir tek shyǵarmashylyq damý jolyndamyn. Osy mamandyqty oqýym, jumys isteýimdi qosqanda 15 jyldaı ýaqytym ketti. Qazaqtyń ulttyq órnekterin, mádenıetin, salt-sanasyn zergerlik óner arqyly álemge tanytqym keledi», deıdi sheber.
Ár áshekeı-buıymynan ásemdik pen joǵary estetıkalyq talǵam, qazaqy naqysh kórinetin zergerdiń aldaǵy shyǵarmashylyq jumystaryna sáttilik tileımiz. «Alash Jewels» buıymdaryn álemniń ár túkpirinen tapsyrys berip alatyn áıdik brendke aınalsa, qazaq mádenıetiniń de qanaty keńge jaıylary sózsiz.