Keshe elordamyzdaǵy Konfessııaaralyq jáne órkenıetaralyq dıalogti damytý jónindegi N.Nazarbaev ortalyǵynda BAQ ókilderi men blogerlerge dinı taqyryptardy jarııalaý erekshelikterin oqytý semınary ótti.
Is-sharanyń negizgi maqsaty – buqaralyq aqparat quraldarynyń ókilderine dinı máselelerdi durys jarııalaýda kómek kórsetý, sondaı-aq taqyrypty kásibı túrde jarııalaý daǵdylaryn shyńdaýǵa múmkindik berý. Semınardy ashqan Ortalyqtyń basqarma tóraǵasynyń mindetin atqarýshy Dıanna Esenova materıaldardy daıyndaý kezinde durys dinı termınder men uǵymdardy qoldanýdyń mańyzdylyǵyn atap ótti.
«Din – óte ózekti ári názik taqyryp. Bul salada maqala jazýda nemese sıýjet túsirýde saqtyq pen uqyptylyq kerek. Eshkimniń dinı senimin qorlaýǵa, dinaralyq narazylyq týǵyzýǵa, zaıyrly memlekettiń ustanymdaryna qaıshy aqparattardy shyǵarýǵa jol bermegen lázim. Árbir jýrnalıstiń, blogerdiń maqsaty – el ishine dúrbeleń salý emes, qoǵamnyń birligi men tynyshtyǵyn saqtaýǵa úles qosý. Sol sebepti dinı aqparatty jazýǵa úlken jaýapkershilikpen kelgen jón», dedi ol.
Sonymen qatar trenıng jumysyna qatysqan Mádenıet jáne aqparat mınıstrligi Din isteri komıteti Dinı ekstremızmniń aldyn alýdy ınternet-keńistiginde úılestirý basqarmasynyń basshysy Japal Dolıev taqyrypty odan ári qaýzap, BAQ-ta dinı materıal jarııalaýdyń naqty keısterine toqtaldy.
Jıyn barysynda qatysýshylar jetekshi sarapshylardan dinı taqyryptardy durys jarııalaý máselelerine qatysty qundy usynystar alyp, ózekti máseleler men syn-qaterlerdi talqylady. Etıkalyq aspektilerge, beıtaraptyq pen obektıvtilik qaǵıdattaryna, sondaı-aq dinı tózimdilikti saqtaý men eldegi ártúrli konfessııalardy qurmetteý máselelerine erekshe nazar aýdardy.
Aıta ketsek, keıingi jyldary din taqyrybynda jazý – salalyq jýrnalıstıka baǵyty retinde damyp keledi. Bul – ýaqyt talabynan týyndaǵan mańyzdy úrdis. Dinı maqala nemese aqparatty osy salada tóselgen, dinı termınderden habary bar, árbir dinniń negizgi erekshelikteri men qaǵıdattaryn biletin adamnyń jazǵany jón. Bul el ishinde dinı alaýyzdyqtyń týyndamaýyna jáne synı oılaý qabileti tómen jandardyń adaspaýyna sebep bolmaq. Osy jáne ózge de mańyzdy oılar aıtylǵan semınardyń sońynda barlyq qatysýshyǵa sertıfıkat tapsyryldy.