Otbasy bank iri qalalarmen qatar óńirlerge basa mán berip, halyqqa baspana alyp berýdiń ártúrli tetigin júzege asyryp jatyr. Sonyń biri – «Qozy Kórpesh – Baıan Sulý jastary» baǵdarlamasy. Jobanyń erterektegi ańyzdyń esimimen atalýynda sımvolıkalyq negiz bar. Sebebi bul baǵdarlama qos ǵashyq – Qozy men Baıannyń ótken jeri Aıagóz aýdanynda júzege asyrylyp jatyr, dep jazady Egemen.kz.
Aıagóz aýdany – Abaı oblysyna qaraıtyn, halqynyń sany 80 myńǵa jýyqtaıtyn irgeli óńir. Tórt jyldan keıin aýdannyń qurylǵanyna týra 100 jyl tolady. Ǵasyrlyq toıy aldynda jergilikti jurttyń qýanyshy eselenip, baspanaly bolyp jatyr. Atap aıtqanda, taıaýda jastarǵa arnalǵan aımaqtyq baǵdarlama boıynsha jas otbasylarǵa jańa kiltterdi tapsyrý rásimi ótken. Bul – Aıagóz aýdany ákimdigi men «Otbasy bankiniń» birlesken baǵdarlamasy. Bastapqy kezeńde jergilikti ákimdik óz bıýdjetinen 81 mln teńge kóleminde qarajatyn bólip otyr.
Aıagóz aýdanynda qurylys qarqyny jyl saıyn artyp kele jatqanyn da atap ótý kerek. Máselen, resmı málimetke súıensek, 2024 jyldyń qańtar men sáýir aılarynda aýdanda 4189 sharshy metr turǵyn úı iske qosylǵan. Bul – 2023 jyldyń sáıkes kezeńine qatysty 107,8% deńgeıinde.
Aýdanda atalǵan baǵdarlama jyldyń basynda iske qosylǵan. Otbasy banktiń óńirlerge nazar aýdarýy kerektigin buǵan deıin esterińizde bolsa, Qazaqstan Respýblıkasynyń Prezıdenti Qasym-Jomart Toqaev Joldaýynda aıtqan edi.
«Basty nazardy oblys ortalyqtaryna emes, aýdandarǵa, mono-qalalarǵa jáne aýyldarǵa aýdarǵan jón», dedi Prezıdent byltyrǵy Joldaýynda.
Ákimdikter belsendi bolsa baspanaly bolǵan otbasylardyń sany artady. Búginde Otbasy bankiniń óńirlerde sátti jumys istep turǵan «О́ńirlik baǵdarlama» atty jobasy osy sózimizdiń dáleli bolady. Tek oblys ákimdikteri tarapynan belsendilik kerek, sonda ǵana bank pen jergilikti atqarýshy bılik yntymaqtasyp, eldimeken turǵyndaryn baspanamen qamtamasyz etpek. Al bul jobadan bas tartpaı, bankpen ymyraǵa kelgen Aıagóz aýdany ákimdiginiń jáne aýdan ákimi Ádilbaı Serikqanulynyń arqasynda bıylǵy jyly jergilikti turǵyndar qonys toılaryn birinen keıin biri atap ótpek. Al Aıagóz jastarynyń baspanaly bolýy arqyly aýdan ákimi Prezıdenttiń tapsyrmasy oryndalyp jatqanyn habarlady.
«Aýdanymyzda osyndaı ıgi baǵdarlama iske asyrylyp jatqanyna qýanyshtymyz. Memleket basshysy júzege asyryp jatqan memlekettik óńirlik baǵdarlamalar qazaqstandyqtardyń jaıly ómir súrýine jáne baspanamen qamtamasyz etýge baǵyttalǵan. Igiligin bizdiń aýdan jastary kórip, qýanyp jatyr. Mundaı baǵdarlamalar jastardy aýdanda qalyp, eńbek etýge yntalandyrady. Sonysymen paıdasy mol. Elimizdiń ár aýdanynda jas qazaqstandyqtardy baspanamen qamtamasyz etýge baǵyttalǵan baǵdarlamalar júzege assyn dep tileımiz», deıdi aýdan ákimi Qanat Ádilbaı.
Bul tapsyrmany buljytpaı oryndaý – óńir basshylyqtaryna mindet. Osy maqsatta Otbasy bank Aıagóz aýdany ákimdiginiń jáne aýdan ákimi Ádilbaı Qanat Serikqanulynyń qoldaýymen aýdan turǵyndaryna baǵdardamany júzege asyrýdyń basty baǵytyn ózgertý boıynsha belsendi jumys atqarýda.
«Jańa úıden baspanaly bolyp otyrǵanymyzǵa qýanyshtymyz. Qalaǵa kóshemiz dep oılaǵanbyz. Biraq aýdanda osyndaı jap-jaqsy úıler berilip, jumysymyz turaqty bolsa, jaıly ómir degen osy emes pe!?», deıdi Saltanat esimdi jas ana.
Baǵdarlamanyń sharttary qandaı
Aıagóz aýdanynyń jastary árleýi taza jańa úıden jeńildetilgen nesıeleý shartymen baspanaǵa qol jetkizdi. Ipoteka boıynsha syıaqy mólsherlemesi 5% (JTSM 5,2%-dan 5,7%-ǵa deıin), bastapqy jarnasy 10% quraıdy. Turǵyn úıdi alǵashqy naryqtan satyp alýǵa múmkindik berilgen. Nesıeniń eń joǵary somasy – 9 mln teńge. Baǵdarlamaǵa densaýlyq saqtaý, bilim berý, mádenıet, sport, BAQ, áleýmettik sala qyzmetkerleri men memlekettik qyzmetshiler qatysqan.
Jalpy aıta keterligi, Otbasy bank Semeı qalasynda da ákimdikpen birlesip, «Abaı jastary» baǵdarlamasynyń ekinshi kezeńin de bastaǵan bolatyn. Ony qarjylandyrýǵa 300 mln teńge bólingen. Baǵdarlamaǵa 35 jasqa deıingi ákimdik kezeginde turǵan mádenıet pen sport, densaýlyq saqtaý salalarynyń jas qyzmetkerleri, BAQ ókilderi qatysa alady. Oǵan nıetti azamattar Abaı oblysy Semeı qalasynda tirkelgen bolýy tıis. Nekede turǵan, sondaı-aq 18 jasqa tolmaǵan balalary bar tulǵalar úshin – osy eldimekende otbasynyń barlyq múshelerin tirkeý mindetti.