«Taza Qazaqstan» bastamasy aıasynda Aqmola oblysynda ekologııalyq is-sharalar jalǵasyp jatyr. Osy baǵytta keshe Kókshetaý qalasynda «Taza Kókshetaý» jobasyn qoldaý maqsatynda tazalyq jumystary uıymdastyryldy.
Is-sharaǵa jastar uıymdarynyń basshylary, azamattyq sektor ókilderi, qalalyq máslıhat depýtattary, belsendi jastar, eriktiler jáne «Jasyl el» jaýyngerlerinen quralǵan barlyǵy 500-ge jýyq adam qatysty. Is-sharanyń negizgi maqsaty – «Adal adam – Adal eńbek – Adal tabys» tujyrymdamasy negizinde qala turǵyndarynyń ekologııalyq mádenıetin arttyrý, tabıǵatqa, qorshaǵan ortaǵa uqypty qaraý qundylyqtaryn dáripteý.
Is-shara barysynda qala turǵyndary baqylaý alańyn tazartyp, «Táýelsizdik» Tý tuǵyryn abattandyryp, Kókshetaý qalasynyń taý bókterin qoqystan tazartty.
«Aqmola oblysynyń turǵyndary Memleket basshysy Qasym-Jomart Toqaevtyń bastamasymen qolǵa alynǵan «Taza Qazaqstan» jobasyn belsendi qoldaıdy. Bul joba tabıǵatqa, óz úıine uqypty qaraýǵa baǵyttalǵan. Osylaısha, qoǵamnyń tazalyǵyna, ekologııaǵa beıjaı qaramaıtyn, aınalasyna qamqorlyq tanytyp, tabıǵatty qorǵaıtyn jastar shoǵyry kóbeıe túsedi», deıdi belsendi jastardyń biri Narıman Meńdibaev.
Jalpy, «Taza Qazaqstan» ekologııalyq aksııasy bastalǵan sátten bastap Aqmola oblysy boıynsha 550-den asa eldi meken qamtylyp, 80 myń tonna qoqys shyǵaryldy. Tarıhı-mádenı eskertkishterdiń aýmaǵyn abattandyrý boıynsha jumys júrgizilip, 200-ge jýyq kóshet otyrǵyzylyp, aǵashtardy ákteý, sýaıdyndarynyń, ózender men kólderdiń aınalasyn qoqystan tazartý, 400 balalar alańy abattandyrylyp, turǵyn úıler men qoǵamdyq ǵımarattardyń qasbetteri jóndeldi. Oblys boıynsha barlyǵy 500 myńǵa jýyq adamnyń qatysýymen 3 500-ge jýyq bir rettik ekologııalyq is-shara ótti.