Astanada qarbalas ýaqytta júk kólikteriniń qozǵalysyna shekteý engizilýi múmkin, dep habarlaıdy Egemen.kz Astana ákimdiginiń baspasóz qyzmetine silteme jasap.
Búgin qala ákimi Jeńis Qasymbek QR Kólik mınıstrliginiń, qala polısııasynyń, tasymaldaýshy kompanııalardyń jáne qurylys kompanııalarynyń ókilderimen kezdesý ótkizdi. Kezdesýde júk kólikteriniń salmaǵyn baqylaý sharalary talqylanyp, qarbalas ýaqytta aýyr jáne iri kólemdi kólik quraldarynyń qozǵalysyna shekteýler engizý josparlanyp otyrǵany aıtyldy.
«Aýyr jáne iri kólemdi kólik quraldary júrgizýshileriniń kópshiligi júktiń salmaq parametrlerin saqtamaıdy. Mysaly, 25 tonnanyń ornyna 100 tonnaǵa deıin, tipti odan da kóp júk tasymaldap júrýi múmkin. Bul birqatar qolaısyzdyq týdyrady: jol qozǵalysynyń ózge qatysýshylaryna qıyndyq týdyrady, ári jolǵa úlken júkteme túsiredi», dep habarlady qala ákimdiginiń baspasóz qyzmeti.
Eske sala keteıik, qyrkúıek aıynan bastap elordada avtokólik ólsheıtin avtomattandyrylǵan júıe iske qosylady. Júıe qazirdiń ózinde synaq rejıminde jumys istep jatyr. Avtomattandyrylǵan ólsheý júıesi qalaǵa negizgi kireberisterde – Pavlodar, Qaraǵandy, Qostanaı, Kókshetaý, Qosshy qalalary, sondaı-aq Qaraótkel jáne Malotımofeevka aýyldary tusynda ornatylǵan.
«Sońǵy aıda 10 myńnan astam zańbuzýshylyq tirkeldi. Bul júıe júk kólikteriniń salmaǵyn baqylaýǵa, qalanyń kólik ınfraqurylymynyń jalpy deńgeıin jaqsartýǵa, ózge de kólikterdiń kedergisiz júrýi úshin neǵurlym qolaıly jaǵdaılar jasaýǵa múmkindik beredi», dep naqtylady ákimdik.
Aıta keteıik, aýyr jáne iri kólemdi kólik quraldarynyń ruqsat etilgen salmaǵy myna mólsherden aspaýy kerek:
úsh osti (M3 sanatyndaǵy býyndy avtobýstardy qospaǵanda) – 25 tonna; tórt osti, onyń ishinde eki basqarylatyn osi bar – 32 tonna; bes osti – 38 tonna; alty nemese odan da kóp osteri bar – 44 tonna.Osylaısha, jalpy salmaq júktiń de, kóliktiń de salmaǵyn qamtıdy. Artyq salmaq bolǵan jaǵdaıda 3 mıllıon 700 myń teńgege deıin aıyppul salynady. Aıyppul mólsheri oske shaqqandaǵy salmaqtyń artý dárejesine jáne kásipkerlik túrine baılanysty – shaǵyn, orta nemese iri – 40 AEK-ten (147 myń 680 teńge) 1000 AEK-ke (3 mln 692 myń teńge) deıin ózgerýi múmkin.