Aldaǵy kúnderi Almaty mektepterinde jasandy ıntellektiniń kómegimen «vırtýaldy repetıtor» paıda bolýy ǵajap emes. Qazirdiń ózinde munyń alǵysharttary naqty júzege asyp keledi.
Bul kúnderi megapolıstegi barlyq mekteptiń oqýshylary qosylǵan «TopIQ.kz» platformasyndaǵy «Jeńil portfel» jobasy sátti júzege asqany týraly qala ákimi Erbolat Dosaev bilim qyzmetkerleriniń tamyz keńesinde málimdedi.
Qala basshysy sıfrlyq oqýlyqtardy engizý jańartylatyn aqparatqa jyldam qol jetkizip, oqý materıalyn túsinýdi ońaılatatyn ınteraktıvti elementterdi qamtıtyny ári balanyń arqasyndaǵy aýyr sómkeni jeńildetetinin aıtady.
Sol sııaqty jańa oqý jyly qarsańynda qaladaǵy balabaqsha pedagogteri men ata-analardy ádistemelik qoldaý úshin «AlmatyKids.kz» damytýshy sıfrlyq kontenti jasalyp, oǵan barlyq balabaqsha qosylǵanyn aıta ketý kerek.
Almaty qalasynyń ákimi Erbolat Dosaev 2024-2025 oqý jylynyń qarsańynda «Digital Kazakhstan: jańa zamandaǵy bilim berý» taqyrybynda ótken pedagogterdiń qalalyq tamyz sammıtinde barlyq mekteptiń oqýshylary men muǵalimderi 6 myńnan astam ádebı týyndyǵa elektrondy jáne aýdıo formatta qol jetkizgenin atap ótti.
Shahar basshysy sıfrlyq sheshimder balalarǵa arnalǵan bilim mazmunyn aıtarlyqtaı damytatynyn, oǵan qosa basqa da ilkimdi jobalar júzege asatynyn málimdedi.
Sonymen qatar Almaty muǵalimderi úshin jasandy ıntellekt salasynda veb-ázirleýshilerdi daıarlaý baǵdarlamasy iske qosylmaq.
Tarata baıandaǵanda, «Almaty mektepteri» baǵdarlamasy sheńberinde qalada oqýshylardyń fýnksıonaldyq saýattylyǵyn, sıfrlyq quzyrettiligi men daǵdysyn qalyptastyrýǵa baǵyttalǵan sertıfıkattalǵan baǵdarlama boıynsha 70 muǵalimniń biliktiligin arttyrý jalǵasyp jatyr. Oqytý «Cambridge International Assessment Education» maquldaǵan oqý materıaldarynyń tórt resmı álemdik baspageriniń biri «Marshall Cavendish» baǵdarlamasy boıynsha júrgiziledi.
«Bıylǵy oqý jylynyń basynan bastap, Almaty qalasyndaǵy memlekettik mektepterdiń muǵalimderine jasandy ıntellekt salasynda veb-ázirleýshilerdi daıarlaýdyń 12 aptalyq arnaıy baǵdarlamasyn iske qosýdy josparlap otyrmyz. Árbir mektep komandasy generatıvti jasandy ıntellekt múmkindigin paıdalana otyryp, óziniń veb-qosymshasyn jasap, iske qosady», dedi shahar basshysy.
Dástúrli tamyz sammıtinde Erbolat Dosaev sıfrlyq oqytý men aqparattyq tehnologııalardyń mańyzdy aspektilerin qamtıtyn IT pánderi boıynsha 100 mekteptiń muǵalimderin oqytý baǵdarlamasy iske qosylsa, bul muǵalimderge ınnovasııalardy oqý úderisine tıimdi engizýge múmkindik beretinine toqtaldy.
Byltyr Almatynyń 6 myńǵa jýyq muǵalimi elimizdi aıtpaǵanda, shetelderde de taǵylymdamadan ótkenin aıtý lázim. Atap aıtqanda, Almatynyń bilim salasyna tıimdi sheteldik ınnovasııalyq tájirıbeni engizý úshin byltyr 207 mektep, balabaqsha basshysy men orynbasarlary, bilim júıesiniń pedagogteri Ulybrıtanııa, Shvesııa, Fınlıandııa, Estonııa, Sıngapýr, Japonııa, Reseı elderinde tájirıbe baıytyp, el ishinde 5 700-den astam taǵylymdamadan ótti. Nátıjesinde, ıaǵnı sheteldik ınnovasııalyq tájirıbe negizinde Almaty pedagogteri mektepterde 117 baǵdarlama men joba, balabaqshalarǵa 35 joba ázirlep otyr.
Sońǵy málimetterge sáıkes, Almatyda mektepterdi pándik kabınettermen jabdyqtaý deńgeıi 85%-ǵa jetken.
Bıyl Almatyda mektepterge ınteraktıvti kontenti bar 168 jańa modıfıkasııa kabıneti satyp alyndy.
Shahar basshysy qaladaǵy mektepterdiń ınfraqurylymyna basa nazar aýdarylatynyna toqtala kele: «Bıyl mektepterge praktıkalyq jáne teorııalyq esepterdi sheshýge ınteraktıvti mazmuny bar 168 jańa modıfıkasııa kabıneti (fızıka, hımııa, bıologııa, robottehnıka, STEM) satyp alyndy. Bul mektepterdi zamanaýı pándik kabınettermen jabdyqtaýdyń 85% deńgeıine qol jetkizýge múmkindik berdi», dedi.
Almatyda 168 jańa kabınettiń engizilýi – mektepterdi zamanaýı pándik kabınettermen jabdyqtaý kórsetkishin ótken jylmen salystyrǵanda 16%-ǵa ósirip otyr.
Sonymen qatar, Ulttyq banktiń Ulttyq tólem korporasııasymen birlesip №201 mektep-gımnazııasynda «Sıfrlyq teńge» platformasynda bastaýysh synyp oqýshylaryn tegin tamaqtandyrýǵa arnalǵan «sıfrlyq vaýcherler» baǵdarlamasy sátti júzege asyp keledi. Atalǵan baǵdarlama boıynsha búginde 50 myńǵa jýyq tranzaksııa júrgizilgen.
Almaty qalasynyń ákimi aldaǵy ýaqytta bul jobany qalanyń basqa mektepterine de engizý josparlanyp jatqanyn jetkizdi.
ALMATY