«Eńbek resýrstaryn damytý ortalyǵy» AQ «Mansap kompasy» atty jańa platformany iske qosty. Sıfrlyq sheshim paıdalanýshylarǵa eńbek naryǵyndaǵy ózekti trendterdi zerdeleýge, ártúrli kásipterdiń suranysyn salystyrýǵa jáne ońtaıly bilim traektorııasyn tańdaýǵa biregeı múmkindik beredi.
Platforma 2019 jyldan bergi elimizdiń eńbek naryǵyndaǵy derekterdi taldaıdy. Bul paıdalanýshylarǵa ózgerister dınamıkasyn baǵalaýǵa jáne bolashaq úrdisterdi boljaýǵa múmkindik beredi.
Joba azamattarǵa eń kóp suranysqa ıe kásipterdi baǵdarlaýǵa jáne eń jaqsy eńbek jaǵdaıy jasalǵan aımaqtardy tańdaýǵa septesedi. Sonymen qatar platforma joǵary oqý oryndary, mamandyqtar jáne memlekettik granttar alý múmkindikteri týraly tolyq málimet beredi.
Jobany bastaý úshin joǵary bilim alýdy talap etetin 400-den asa keń taralǵan mamandyqtarǵa tereń taldaý júrgizildi. Kelesi kezeńderde osyndaı jumys negizgi tehnıkalyq jáne jumysshy mamandyqtar boıynsha, sondaı-aq qosymsha bilim salasynda júrgiziledi.
2024 jyldyń sońyna qaraı mamandyqtar týraly derekterdi dálirek boljaý jáne taldaý úshin mashınalyq oqytý modelderin engizý josparlanyp otyr. Portalda jańa fýnksıonal paıda bolady. Mysaly, kásipter, bilim baǵdarlamalary men jumys oryndary týraly aqparatty saqtaýǵa arnalǵan málimetter bazasy, sondaı-aq paıdalanýshylardyń daǵdylaryn baǵalaý jáne jaqsartý quraldary sııaqty basymdyqtar qarastyrylady.
«Mansap kompasy» jobasynyń aýdıtorııasy óz mansabyn josparlaýǵa jáne kásibı damýǵa múddeli adamdardyń ártúrli sanatyn qamtıdy. Birinshi kezeńde – mektep túlekteri men stýdentter. Olar úshin platforma suranysqa ıe mamandyqtar, joǵary oqý oryndaryna túsýshilerge qoıylatyn talaptar jáne granttar alý múmkindikteri týraly aqparat kózi bola alady. Sondaı-aq tańdalǵan mamandyqtyń bolashaǵyn baǵalaý, taǵylymdamadan ótý jáne bolashaq jumysty izdeý úshin málimet beredi», dep atap ótti ERDO vıse-prezıdenti Shalqar Baıqulaqov.
Sonymen qatar portal mamandyǵyn ózgertkisi keletin adamdar úshin de óz paıdasyn tıgizbek.