Respýblıkalyq mańyzǵa ıe jol jelisin jańǵyrtý boıynsha strategııalyq mańyzdy telimderdegi jumystyń negizgi kezeńi aıaqtaldy. Jańartylǵan joldyń uzaqtyǵy – 900 shaqyrym.
Eldiń ortalyǵy men ońtústigin jalǵaıtyn, uzyndyǵy 885 shaqyrymdy quraıtyn «Qaraǵandy – Almaty» tasjoly 85%-ǵa daıyn. Búginde onyń 863 shaqyrymynda jańa asfalt-beton jabynymen qozǵalys qamtamasyz etilgen. Atalǵan kólik dálizindegi jumystarǵa 1 312 birlik tehnıka, 2 448 qyzmetker jumylǵan. Kúre jolda 46 jol ótpesi, 30 kópir, 7 kólik aıyryǵy jáne 661 sý ótkizý qubyry salyndy.
Nátıjesinde, 363 shaqyrym bolatyn «Qaraǵandy – Balqash» tasjolyn aınalyp ótý qajettiligi joıyldy. Sondaı-aq Qaraǵandy qalasynan Aqbastaý jáne Aqsý aýyldaryna deıingi joldyń tórt jolaǵy boıynsha qozǵalys ashyldy. Atalǵan ýchaskede asfalt-beton tóseý jumysynyń 90%-y aıaqtaldy. Jýyq arada barlyq jańartylǵan telimder boıynsha kólik qozǵalys bastalady. Bıyl «Balqash – Burylbaıtal» jolynda aýqymdy jumys júrgizilip, telimniń 80%-yna jańa asfalt beton tóseldi. Qazir 288 shaqyrymnyń 266 shaqyrymy qozǵalyspen qamtamasyz etilgen. Sondaı-aq Kúrti men Burylbaıtaldy jalǵaǵan uzyndyǵy 228 shaqyrym jol dálizi tolyq jańardy. Asfalt-beton jabynyn tóseý jumystary 85%-ǵa aıaqtalyp, jańa asfalt qabatymen qozǵalysqa ruqsat bergen. Osy kezde jaýapty merdiger uıym tosqaýyl qorshaýyn, jol tańbalarymen belgilerin ornatýǵa kiristi.
«Shamalǵan stansasyn aınalyp ótý» avtojolynda 3 birlik jol ótpesi, 1 mal ótkeli, 1 kópir, 3 sý ótkizý qubyry ornatyldy. Respýblıkalyq mańyzy zor joba jumystary tolyq aıaqtaldy. Taıaýda tolyq el ıgiligine berilmek.
Halyqaralyq turǵyda mańyzdy sanalatyn «Aqtóbe – Qandyaǵash – Atyraý – RF shekarasy (Astrahanǵa qaraı)» tasjolynyń 732 shaqyrymy qaıta jańartý jumysymen qamtyldy. Atalǵan avtomagıstralde 47 jol ótpesi, 6 kólik aıyryǵy, 526 sý ótkizý qubyry salyndy. Jobaǵa 1 312 birlik tehnıka men 2 448 jumysshy jumyldyryldy. Qazir avtojoldyń tutas boıynda asfalt-beton tóseminiń joǵarǵy jáne tómengi qabaty boıynsha qozǵalys ashyq.
«Aqtóbe – Qandyaǵash» ýchaskesinde 18 kópir boıynsha kólik qozǵalysy iske túsip, 8 estakada salyndy. Asfalt-beton tóseý jumystary 97%-ǵa atqaryldy. Jabynnyń joǵarǵy qabatyn tóseý jáne joldy abattandyrý sharasy jalǵasyp jatyr.
Búginde «Atyraý – Astrahan» baǵyty boıynsha rekonstrýksııa jumystary bıyl jyl sońyna deıin tolyq máresine jetedi degen jospar bar. Qaıta jańartylatyn telimniń uzaqtyǵy – 212 shaqyrym. Asfalt-beton jabynyn tóseý boıynsha jumys 82%-dy quraıdy. Qazir joldaǵy jumys belsendi túrde jalǵasyp jatyr. Ýchaskedegi qozǵalys qarqyny táýligine shamamen 5 000 avtokólikke jetken. Aıta keteıik, atalǵan tasjol tolyq paıdalanýǵa berilgennen keıin sapar ýaqyty 2,5 saǵatqa deıin qysqarady dep kútilip otyr.