Qyrkúıek aıy jaqyndaǵan ýaqytta Memleket basshysynyń dástúrli Joldaýyn taǵatsyzdana kútkenimiz ras. Sebebi Prezıdent Joldaýy mańyzdy qujatqa aınalyp, aldaǵy bir jylda atqarylýǵa tıis aýqymdy sharýalardyń jospary túziletinin ańǵaryp júrmiz. Ásirese memlekettik organdardyń ókilderi jumysyn bir pysyqtap alatyny anyq. Keıin el turǵyndarynyń ál-aýqatyn arttyrýǵa baǵyttalǵan memlekettik baǵdarlamalar júzege asatyny qýantady-aq. «Halyq únine qulaq asatyn memleket» tujyrymdamasynyń kózdegeni de osy emes pe?
Bıylǵy Joldaý «Ádiletti Qazaqstan: zań jáne tártip, ekonomıkalyq ósý, qoǵamdyq optımızm» dep atalypty. Keıingi jyldary Ádiletti Qazaqstan degen tirkes jıi aıtylyp júr. Bul tegin emes. Buǵan deıin halyqtyń kókeıinde turǵany da osy másele edi. Ádiletti qoǵam qalyptassa, zań da, tártip te, ekonomıkalyq ósim de bolatyny aqıqat.
Joldaýda bilim berý júıesin damytýǵa jáne tehnıkalyq kadrlardy daıarlaýǵa erekshe mán berildi. Memleket basshysy eldiń turaqty ekonomıkalyq ósýi men básekege qabilettiligin arttyrý úshin bilikti mamandardy, ásirese, tehnıkalyq jáne ınjenerlik salalarda daıarlaýǵa basa nazar aýdarý qajet ekenin atap ótti. Búginde elimizde tehnıkalyq mamandyqtardy daıarlaýǵa basymdyq berilip jatqanyn bilemiz. Sol baǵytqa bilim granttary molynan bólinip, barynsha qoldaý kórsetilip jatyr. Bul – kóregen saıasat. Túptiń túbinde tehnıka mamandyqtarynyń ıeleri el damýyna úlken úles qosatynyna senim mol. Memleket basshysynyń eńbek adamdaryna qurmet kórsetý mańyzdy ekenin jıi aıtýy – tehnıka mamandyqtaryn, ıaǵnı qarapaıym jumysshy mamandyqtaryn nasıhattaýdyń bir tetigi ispettes.
Prezıdent tehnıkalyq jáne kásibı bilim berý júıesin damytýǵa toqtalyp, ındýstrııalandyrý jáne el ekonomıkasyn ártaraptandyrýǵa eleýli úles qosatyn ınjenerlik jáne ǵylymı kadrlardy daıarlaýdy jaqsartý qajettiligin aıtty. О́ńdeýshi ónerkásipte, iri zaýyttarda, basqa da joǵary tehnologııalyq salalarda joǵary bilikti mamandarǵa degen suranystyń artyp jatqanyn eskersek, kadr daıyndaý isi júıeli atqarylǵany abzal.
Qasym-Jomart Toqaev óz Joldaýynda ǵylymı zertteýlerdi damytý jáne bilim berý úderisine ınnovasııalyq tehnologııalardy engizýdiń mańyzyn atap ótti. Qazaqstan jańa tehnologııalyq kóshbasshylardy qalyptastyrý úshin tıimdi jaǵdaı jasaýdy kózdeýi kerek, bul ǵylym men tehnologııaǵa qomaqty ınvestısııa salmaı jáne joǵary bilim berý júıesin reformalamaı múmkin emes ekenine erekshe toqtaldy.
Jas mamandardy qoldaý jáne olardyń biliktiligin arttyrý aıasynda Prezıdent ekonomıkanyń negizgi salalary úshin joǵary bilikti kadrlar daıarlaýǵa baǵyttalǵan «Jas maman» baǵdarlamasyn atap ótti. Bul bastama oqý oryndarynyń sanyn kóbeıtý, olardy zamanaýı jabdyqtarmen jáne ádistemelik qoldaýmen qamtamasyz etý maqsatynda jalǵasyn tappaq.
Sondaı-aq ınjenerlik bilim men ǵylymnyń jańa tehnologııalary boıynsha ǵylymı-zertteý habyn qurýǵa tapsyrma berildi. Bul rette kóptegen ýnıversıtette Ǵylym jáne joǵary bilim mınıstrligi qoldaýymen tehnopark jáne ınjenerlik ortalyqtary qurylyp jatyr. Bul ortalyqtar aldaǵy ýaqytta otandyq ulttyq kompanııalarmen baılanys ornatpaq.
Qoryta aıtsaq, Joldaýda bilim berý jáne tehnıkalyq kadrlardy daıarlaý máselesine basa nazar aýdarylýy Qazaqstannyń bilim men joǵary tehnologııalarǵa negizdelgen ekonomıkany qurýǵa umtylysyn kórsetedi. Bul – elimizdiń odan ári turaqty damýynyń negizgi faktory.
Alýa TAŃJARYQOVA,
Abaı atyndaǵy QazUPÝ professory, f.ǵ.d., fılologııa fakýltetiniń dekany