Qazaq-Brıtan tehnıkalyq ýnıversıtetinde Prezıdent janyndaǵy Ulttyq ǵylym akademııasynyń uıytqy bolýymen Memleket basshysy Joldaýyn iske asyrý aıasynda «Qazaqstan ǵylymynyń qazirgi jaǵdaıy men damý keleshegi» atty ǵylymı-praktıkalyq konferensııa ótti. Oǵan Ǵylym jáne joǵary bilim mınıstrliginiń ókilderi, UǴA akademıkteri, joǵary oqý oryndary men ǵylymı zertteý ınstıtýttarynyń basshylary, elimizdiń jáne sheteldiń jetekshi ǵalymdary, táýelsiz sarapshylar, sondaı-aq otandyq ǵylymdy damytýǵa belsene atsalysatyn jas ǵalymdar qatysyp, ǵylymdy damytý men jas mamandar áleýetin arttyrýǵa qatysty oı-pikirlerimen bólisti.
Jıynda Prezıdent janyndaǵy Ulttyq ǵylym akademııasynyń prezıdenti Aqylbek Kúrishbaev Memleket basshysynyń Joldaýynda elimizdiń áleýmettik damýy men ekonomıkanyń ınnovasııalyq áleýetin kúsheıtýge baılanysty asa mańyzdy mindetter qoıyp otyrǵanyn atap ótti.
«Bul tapsyrmany júzege asyrýda ǵalymdarǵa erekshe jaýapkershilik júkteledi. Sondyqtan ǵylymnyń kúsh-qýaty ǵylymı zertteýlerdiń tıimdiligin arttyrýǵa, zertteý qyzmetine bólingen qarajatty durys paıdalanýǵa, onyń nátıjesin óndiriske engizýge baǵyttalýǵa tıis. Bul rette qaıta qurylǵan Prezıdent janyndaǵy Ulttyq ǵylym akademııasy jetekshi ról atqarady. Máselen, ǵylymı zertteýler deńgeıin arttyrý, ǵylymdy basqarý modelin jetildirý, ekonomıkany ártaraptandyrý men qoǵamdy damytýǵa ǵylymnyń basym baǵyttaryn anyqtaý qajet. О́kinishke qaraı, ǵylymdy qarjylandyrý kólemi ulǵaıǵanymen, zertteý baǵyttary kenjelep qaldy. Osy oraıda UǴA ekonomıkanyń naqty sektoryn damytýda basym baǵyttaǵy zertteýlerdi qarjylandyrýǵa kóńil bólip, onyń tıimdiligin arttyrýdy iske asyrady», dedi ol.
Sondaı-aq konferensııa barysynda sarapshylar ǵylymdy sıfrlandyrý, jasandy ıntellektini damytý, densaýlyq saqtaý júıesin reformalaý, aýyl sharýashylyǵyn damytýǵa baǵyttalǵan memlekettik qoldaý sharalaryn jetildirý jáne Joldaýda kórsetilgen basqa da mańyzdy máselelerdi iske asyrýǵa baılanysty usynystaryn ortaǵa saldy.
ALMATY