Batys Qazaqstan oblysy Qaztalov aýdanynda 8 otbasy baspanaly bolyp, aýdan ortalyǵyndaǵy sport kesheni men Qaıyńdy aýylyndaǵy mádenıet úıi paıdalanýǵa berildi. Qýanyshty jıynǵa oblys ákimi Narıman Tóreǵalıev qatysty.
Budan buryn oblysta «Qaladan – aýylǵa!» keshendi baǵdarlamasy qolǵa alynǵanyn habarlaǵan edik. Qaztalov aýdanynda osy bastama qarqyndy júrip jatyr. Mine, Bolashaq aýyldyq okrýginiń Jańatań jáne Kópkútir eldi mekenderinde 4 otbasy jańa baspanaǵa ıe boldy.
– О́ńirde Memleket basshysynyń tapsyrmasymen birqatar ınfraqurylymdyq joba, memlekettik baǵdarlama, óńirlik baǵdarlamalar da júıeli júzege asyp jatyr. Sonyń ishinde «Qaladan – aýylǵa!» jobasy aýyldardy damytýǵa sep boldy, jas otbasylarǵa da úlken qoldaý. Baǵdarlama aıasynda Qaztalov aýdanyna kóship kelgen jas otbasylardy quttyqtaımyn. Shańyraqtaryńyz berekeli bolyp, qýanysh pen shattyqqa tolsyn! — dedi oblys ákimi turǵyn úı kiltin saltanatty túrde tabystap turyp.
Aıta keteıik, dál osy joba aıasynda aýdanda 16 turǵyn úı satyp alynǵan. Búginge deıin aýyldarǵa 14 shańyraq kóship kelip, ornalasypty. Osy otbasylarda 78 jan bolsa, sonyń 50-i bala eken. Barlyq otbasy turaqty jumyspen qamtylyp, mektep jasyndaǵy 24 bala mektepke, 25 bala balabaqshaǵa ornalasqan.
– Biz osy baǵdarlama arqyly Jańatań aýylyna bıylǵy aqpan aıynyń basynda kóship keldik. Qaladan kelgen boıda basymyzǵa ýaqytsha turǵyn úı berdi, qoramyzǵa sıyr men qoı-eshki kirgizdi. Qazir sol tórt túliktiń ıgiligin kórip otyrmyz. Joldasym Aıat ekeýmiz turaqty jumysqa ornalastyq. Osy úıdiń qurylysyna da kúıeýim ózi atsalysty. Qushaq jaıa qarsy alǵan aýyl halqyna alǵysymyz sheksiz, – deıdi sý jańa úıge kirgen Shynaraı Tóremuratova.
Qaıyńdy aýyly aýdan ortalyǵyna edáýir qashyq ornalasqan. Aýyl turǵyndary mádenıet oshaǵy kerektigin jıi aıtyp júrýshi edi. Halyqtyń talap-tilegi oryndalyp, zaman talabyna saı rýhanı keshen esigin aıqara ashty. «Aýyl – el besigi» baǵdarlamasy aıasynda salynǵan mádenıet úıinde 150 oryndyq kórermen zaly bar, aýyldyq kitaphana da osynda ornalasqan.
– Sońǵy jyldary óńirde, aýdan-aýyldarda jańadan bilim ordalary men mádenıet úıleri kóp salynyp jatyr. Qaıyńdy aýylyndaǵy mádenıet úıiniń jobasyn ózge de eldi mekenderde júzege asyramyz. Aldaǵy ýaqytta Qaztalov pen Qaıyńdy baǵytynda jol salýdy da oılastyryp jatyrmyz, – dep qýantty Narıman Tóreǵalıev aýyl turǵyndaryn.
Joǵaryda atalǵan 8 úıdiń tórteýi qaladan aýylǵa kóship kelgen otbasylarǵa berilse, qalǵan 4 baspana úı kezeginde turǵan muqtaj azamattarǵa tabystaldy. Jalpy aýdan boıynsha bıyl Prezıdent tapsyrmasyna sáıkes 28 eldi mekende úı kezeginde turǵan áleýmettik osal toptaǵy otbasylarǵa arnap qos páterden 116 úıge qarjy bólinip, qurylys júrgen edi. Mine, sol úıler qazir óz ıesin taýyp jatyr.
– Búgin Prezıdentimiz Qasym-Jomart Kemelulynyń bastamasymen aýyl-aımaqtardy damytý boıynsha berilgen tapsyrmasynyń arqasynda baspanaly boldyq. Osy baǵdarlamanyń júzege asýyna atsalysqan barsha azamatqa jáne jańa baspana salyp bergen merdigerge rızashylyǵymdy bildiremin, – deıdi Qaztalov aýylynyń turǵyny Araılym Sansyzbaeva.
Dál osy kúni aýdan ortalyǵynda 320 oryndyq sport kesheniniń qurylysy aıaqtalyp, paıdalanýǵa berildi. Nysannyń ashylý saltanatyna oblys ákimi Narıman Tóreǵalıuly, aýdan ákimi Aslanbek Sarqulov, oblystyq máslıhat depýtattary Turarbek Tilemisuly, Samat Hamzauly, «KPO B.V.» kompanııasy bas dırektorynyń orynbasary Muhtar Mankeev qatysty. Biraz jyldan beri qurylysy turyp qalǵan nysannyń aqyry halyq ıgiligine jaraǵanyna el-jurt rıza. Sport kesheninde voleıbol, fýtzal, basketbol oıyndaryna arnalǵan zal jáne boks, dzıýdo, kúres, jattyǵý zaldary bar. Endi bul jerde aýyl balalaryna túrli sporttyq seksııa ashylyp, jumys isteıdi.
Batys Qazaqstan oblysy