Tanymal sazger, telejúrgizýshi Arman Dúısenov ómiriniń sońǵy kúnderi Indıra Elemestiń jertóledegi stýdııasynda turyp júrgen. О́kinishke qaraı, óner ıesiniń aqtyq demi de dál sol án jazý stýdııasynda taýsylǵan, dep jazady Egemen.kz.
«Astarly aqıqat» baǵdarlamasynda Indıra Elemes aıtqandaı, ol Arman Dúısenovpen týǵan aǵaly-qaryndastaı qarym-qatynasta bolǵan. Sondyqtan ánshi sazgerdiń qazasyn aýyr qabyldaǵan.
«Júregi toqtap qalyp, bir sátte ketip qaldy. Aýyryp, syrqattanyp, qınalyp jatqan joq. Balalardyń aıtýynsha, sý ishken. «Qalaısyz, bári jaqsy ma?» degende «ıá» depti. Sý ishti, jatty, sodan ketip qalypty. Tańǵy saǵat 9 shamasynda», deıdi Indıra Elemes.
О́ner ıesi tipti marqumnyń janazasyn óz úıinen shyǵarýǵa árekettengen kórinedi.
«Týǵan aǵamdaı jaqsy kórdim. Mundaı nárse aıtý aýyr. Sol ýaqytta Arman aǵa qatty kúızeliste júrgen. Januıasyn, bala-shaǵasyn, áıelin qatty saǵyndy. Eger úı bolmasa, janazasyn bizdiń úıden shyǵaraıyq dep nıettendim, biraq ımamdar qarsy boldy», dedi ol.
Arman Dúısenovtiń janazasy Almaty ortalyq meshitinde oqyldy.
Indıra Elemestiń sózinshe, ómiriniń sońǵy kúnderi ol bárimen qoshtasqandaı bolǵan.
«Arman aǵa otbasyn, qyzyn, uldaryn, ásirese kishkentaıyn óte qatty jaqsy kórdi. Sóılesip qalǵanda 100-diń 90 paıyzynda otbasy, áıeli jaıly aıtatyn. Áıeli Aısulý hanymdy qatty jaqsy kóretin. Sońǵy sátterde qoshtasqandaı da boldy.
«Men ózimmen maqtanamyn, sebebi óte jaqsy balalardy asyradym. Ulym Abylaı meniń ornymdy basa alady» degen kezde men «Aǵa, qoıyńyzshy» deıtinmin. Tek qyzyn qatty ýaıymdaıtyn, sebebi ol Londonda oqıtyn», dedi ol.
Sońǵy jyldary Arman Dúısenovti telearnalardan shettetip, sahnadan alystatqany týraly da aıtylǵan. Indıra Elemes bul máselege qatysty da pikir bildire ketti.
«Shaqyrǵandar boldy, arada ne bolǵanyn qaıdam, biraq keıin sol kisiler shaqyrmaı qaldy. Arman aǵanyń atynan «ol kisi syrqattanyp jatyr, eshqaıda shyqpaıdy» dep aıtqandar da bar eken. Aǵanyń ózi de tańǵalatyn», dedi ol.