Almatyda gaz ınfraqurylymynyń qurylysy aıaqtaldy

Bul – JEO arnalǵan gaz ınfraqury­lymynyń tórtinshi nysany. Onyń uzyndyǵy – 62,4 km, dıametri – 530mm, ótkizý qabileti – saǵatyna 1 000 000 m3.

«Búgingi kúni barlyq jumys aıaqtaldy. Obektiniń mańy retke keltirildi. Gaz qubyrynyń jumysy tekserildi. Magıstraldy gaz qubyrynyń ekinshi tarmaǵy tutynýshylardy jáne JEO-2, JEO-3 nysandaryn tabıǵı gazben turaqty túrde qamtamasyz etýge yqpal etedi», dedi Nurlan Jaqypov.

Sonymen qatar gaz tasymaldaý jú­ıe­­sin keńeıtý qoldanystaǵy Almaty-Baıserke-Talǵar bir jelilik gaz qubyrynyń toqtap qalýyna baılanys­ty tótenshe jaǵdaılardy boldyrmaýǵa múmkindik beredi.

«Memleket basshysynyń Almaty qalasynyń Jylý elektr ortalyqtaryn gazdandyrý týraly tapsyrmasy aıasynda «QazaqGaz» ulttyq kompanııasy «Almaty-Baıserke-Talǵar» MGQ ekinshi tarmaǵynyń qurylysyn aıaqtady. Bizdiń enshiles kompanııamyz «Intergaz Ortalyq Azııa» barlyq jumysty merziminen buryn aıaqtady. Osy oraıda jobanyń sátti júzege asýyna qoldaý bildirgen «Samuryq-Qazyna» qory, Almaty qalasy, Almaty oblysynyń ákimdigine erekshe alǵysymdy bildiremin», dedi Sanjar Jarkeshov.

Syrtqy gaz ınfraqurylymyn daıyndaý tórt aýqymdy nysannyń qurylysyn qamtydy: JEO-2 jáne JEO-3 eki avtomatty gaz taratý stansasy, olardyń ónimdiligi saǵatyna 250 jáne 150 myń tekshe metr. Almaty-Baıserke-Talǵar jáne Qazaqstan-Qytaı  gaz  qubyrlary arasyndaǵy ónimdiligi saǵatyna 1 mln tekshe metrdi quraıtyn TIP-04 gaz qubyryn jalǵaýshy,  sondaı-aq Almaty-Baıserke-Talǵar magıstraldyq gaz  qubyrynyń ekinshi jelisi. 2023 jyldyń qarasha aıyn­da eki avtomatty gaz taratý stansasy men TIP-04 gaz qubyry merziminen buryn paı­dalanýǵa berildi.

Almaty jylý elektr stansalaryn gazǵa kóshirý qalanyń ekologııalyq ahýalynyń jaqsarýyna yqpal etedi. Sonymen qatar Almaty qalasy men Almaty oblysynyń gaz tasymaldaý jú­ıe­sin keńeıtý, kásipkerlik pen óner­ká­sip­tik kásiporyndardyń damýyna jańa serpin beredi. Tıisinshe, jańa jumys oryndary ashylyp, óńir ekonomıkasyna mýltıplıkatıvtik áser etedi.