Olar on bes jyl otasty. Otbasynda ydys-aıaq syldyrlaǵan shyǵar, biraq ekeýiniń bir-birine degen syılastyǵyna eshqandaı syzat túspedi. Endeshe, nege ajyrasty?
Olar bir perzent súıýge zar boldy. Alǵashqy jyldary «áli bastaryń jas qoı, bópeli bolarsyńdar» deıtin úlkenderdiń sózin jubanysh tutyp júretin. Keıin... Kópke kórsetpese de, ekeýi ońasha qalǵanda aǵyl-tegil jylaıtyn boldy. Emdelmegen dáriger, kórinbegen táýip qalmady. Dos-jarandarynyń ul-qyzdary ósip, tipti turmys quryp, otaý kótere bastady. Al bular bir balany armandaýmen júrdi. Ashyq aıtpasa da, kópshilik kelinshekti kinálaıtyny belgili. Áıel adam keıde erkekke qaraǵanda batyldaý kele me, qalaı?
Birde Ajar Qurmetke ajyrasý týraly oıyn aıtty.
– Seniń sońyńda urpaq qalý kerek. Úlkender de nemere kúte-kúte shydamdary taýsylyp bitti. Kúsh-qaıratyń bar kezde basqa bireýmen kóńil jarastyrǵanyń jón. Ekeýmiz ajyrasaıyq, – degen kelinsheginiń sózine áýelgide ne derin bilmeı qaldy.
«Qalaı ajyrasamyn? О́zimniń súıip qosylǵan adal jarym emes pe?» dep Qurmet az qınalǵan joq. Biraq Ajardyń aqyly da , batyly da basym bolyp shyqty. «Tańerteń úlkenderge osy sheshimdi jarııalaımyz» dedi ol.
Balalarynyń shańyraǵy shaıqalǵanyn qaı ata-ana qalasyn, ul men kelinniń sózderi olarǵa naızaǵaı soqqandaı áser etti. Nemere ańsap júrgenderi de ras.
– Qaraǵym, kelin. Osynshama jyl aldymyzdan qııa basyp ótken joqsyń. Eshqandaı ókpemiz joq. Qudaı bermese, ne isteımiz? Aralaryńda dáneker bolmaǵasyn ajyrasqaly otyrsyńdar. Men kórshi-qolań, aǵaıyn-týystyń basyn qosyp, quda-qudaǵaıdy dámge shaqyryp, rızashylyǵymdy bildirip, aldaǵy ómirińe aq jol tilegimdi aıtyp, batamdy bergim keledi, – degen qaıynatasy sol sózinde turyp, balasy men kelinin syılastyǵy buzylmaǵan qalpy ajyrastyrdy. Ajar bulardy, bular Ajardy qımaı qoshtasty.
Arada jyl ótkende Ajar áıeli qaıtys bolǵan, jasy úlkendeý kisige turmysqa shyqty. Ol kisi de burynǵy áıelinen perzent súımegen eken. Olar «Eki jarty bir bútin bolsaq, aǵaıynnyń bireýiniń balasyn asyrap alarmyz» degen edi. Mine, ǵajap! Ajar kóp uzamaı boıynda ózgeris baryn sezdi. Shekesi torsyqtaı ul keldi ómirge! Senesiz be, joq pa? Muny estigen burynǵy ata-enesi qastaryna Qurmetti ertip, arnaıy quttyqtap kelip-ketti. Sodan soń kóp uzamaı Qurmet te úılendi. Bul jaqta da keremet jaǵdaı oryn aldy. Jýyrda ǵana Qurmettiń kelinshegi de ómirge ul bala ákeldi. Ǵajap qoı!
Eger... ajyraspaı júre bergende she? On bes jyl ańsap kútken perzent súıý baqytyna ajyrasqannan soń ıe bolǵandaryn qarasańyzshy! О́mirdi túsinip bolmaımyz-aý, sirá. Olar perzent úshin ajyrasty ǵoı. Perishteler tilekterin qabyl etken bolar. Qalaı desek te, olardyń ekeýi de armandaryna jetti, baqytqa keneldi.