Semeı qalasy kúnine oraı oblys ortalyǵyna qarasty Sementshiler kentinde páter kezeginde turǵan áleýmettik osal top sanatyndaǵy 20 otbasyna páter kilti tabystaldy. Kópbalaly otbasylar, erekshe qajettiligi bar azamattar, ata-ana qamqorlyǵynsyz qalǵan balalar sońǵy úlgide salynǵan baspanaǵa qol jetkizdi. Úıde múmkindigi shekteýli jandardyń kirip-shyǵýyna qolaıly jaǵdaı jasalǵan.
Keıingi jyldary qalada qurylys qarqyny artyp keledi. Osyǵan deıin boı kótergen turǵyn úılerden 525 otbasy jańa páterge qonystandy. Bıyl naýryzda da Qaraǵaıly shaǵyn aýdanynda turǵyn úı kezeginde turǵan 77 azamat baspanamen qamtyldy. Tamyz aıynda 237 adam qoldaryna jańa páterdiń kiltin aldy. О́tken jyly páter kezeginde turǵan 211 otbasy baspanaly boldy.
Sonymen qatar qalanyń damýyna úles qosyp kele jatqan ártúrli sala mamandaryna «Semeı qalasynyń qurmetti azamaty» jáne «Úzdik qyzmetker» ataǵy berildi. Merekelik is-sharada sóz alǵan qala ákimi Nurbol Nursaǵatov eńbegimen elengen jandardyń ómiri men qyzmeti kópke úlgi ekenin atap ótti.
«Búgin Semeı qalasynyń qalyptasýy men damýyna laıyqty zor úles qosqan azamattardy ulyqtap otyrmyz. Semeı qalasynyń qurmetti azamaty ataný – birrettik jumystyń nátıjesi emes, uzaq jyldar boıy bir salada taban aýdarmaı jemisti eńbek etkenderińizdiń, qyzmet jasaǵandaryńyzdyń jemisi. Sizderdiń eren eńbekterińiz ben ónegeli ómirlerińiz óskeleń urpaqqa óshpes úlgi», dedi N.Nursaǵatov.
Semeı qalasynyń damýyna qosqan úlesi elenip, qoǵam qaıratkeri Mensafa Ýsmanova, sport ardageri Iýrıı Maslov, bilim berý salasynyń úzdigi Jumaǵazy Stambekov, 2012 jyldan bastap qazirgi ýaqytqa deıin «Spýtnık» MT JShS basqarma tóraǵasy qyzmetin atqaratyn Qaırat Mırashev, sýretshi, pedagog Tóleýǵazy Jubanyshev, fýtbolshy, halyqaralyq sanattaǵy tóreshi Aleksandr Borısov, «Altyn dáriger» tósbelgisiniń ıegeri, hırýrg Bazar Tóleýov «Semeı qalasynyń qurmetti azamaty» atandy.
Sondaı-aq qarapaıym eńbek adamdary da nazardan tys qalǵan joq. Avtobýs júrgizýshisi Darhan Jaýkenov, elektr mamany Nurtas Janaqymetov, qosalqy jumysshy Máýitqazy Rahymbaev, áleýmettik qyzmetker Raýshan Musabekova, mehanık Mavletıan Hazıpov, sý sharýashylyǵynyń qyzmetkeri Dýman Moldenov, jylý stansasynyń qyzmetkeri Iýrıı Klımenko, jol jóndeý jumystaryna atsalysqan Marat Ramazanov «Úzdik qyzmetker» ataǵyna ıe boldy. Olarǵa Alǵyshattar men 100 myń teńgelik sertıfıkattar tabystaldy.
Qala ákimi N.Nursaǵatov Semeı qalasynyń 103 jastaǵy eń qart turǵyny Zeıne Amanbaevanyń shańyraǵyna arnaıy baryp, qurmet kórsetti. Zeıne apa 1921 jyly Abyraly aýdanynda dúnıege kelgen. Soǵys jyldary kolhozda ártúrli jumys atqarǵan. Keıin Semeıde qoǵamdyq jumystarǵa belsene aralasyp, halyq qurmetine ıe bolǵan. Onyń ómirlik joldasy da zań salasynda uzaq jyldar boıy qaltqysyz qyzmet etti. Búginde Zeıne apa – nemere-shóbereleriniń qurmetine bólenip otyrǵan abzal ana.
Abaı oblysy