Qazaqstan respýblıkalyq teleradıokorporasııasy jańa televızııalyq maýsymdaǵy jobalarynyń tanystyrylymyn ótkizdi. Tikeleı efır stýdııasynda ótken is-sharaǵa shyǵarmashyl qaýym, sala ardagerleri, rýhanııat ókilderi qatysty. Sońǵy jyldary dástúrge aınalǵan tanystyrylym bir jaǵynan jańa ónimderdi nasıhattaý bolsa, ekinshiden ótkendi qorytyndylap, bolashaq shyǵarmashylyq jumysty pysyqtaýǵa saıady.
Jańa maýsym tanystyrylymyn telearna tilshileri men olardyń jasandy ıntellekt arqyly jasalǵan obrazdary birlesip júrgizdi. Eldegi eń úlken medıa ujym kúzgi maýsymda aýdıtorııanyń barlyq sanatynyń suranysyn qamtıtyn túrli janrdaǵy 28 jańa baǵdarlama, jalpy serııalarynyń sany 150 bólimdi quraıtyn 11 jańa telehıkaıa men derekti fılmder jelisin usynady eken.
Onyń ishinde qoǵamǵa meıirbandyq, jaýapkershilik, janashyrlyq sekildi qundylyqtardy qarapaıym keıipkerler arqyly ornyqtyrýǵa baǵyttalǵan «Jaqsylyq jasa» atty jańa baǵdarlamany erekshe atap ótýge bolady. Juma kúni keshke efırge shyǵatyn habardyń birneshe shyǵarylymy kórermenge jol tartty. О́z ómirin qıyp, 130 balany qutqarǵan qaraǵandylyq polısııa qyzmetkeri Qaırat Jumabekovtiń, Jambyl oblysyndaǵy jol apatynda órtke oranǵan kólikten birneshe adamdy alyp shyqqan Mádı Álıevtiń, Astanada 15 jastaǵy jasóspirimdi páterdegi órtten arashalap alǵan Altynbek Altaevtyń erlik isteri men oqıǵa kýágerleri kórsetildi.
Ulttyq arna eldiń 17 aımaǵynyń ereksheligin qamtıtyn «Atameken» televızııalyq trevel-shoý baǵdarlamasyn da qolǵa alypty. Trevel-shoý – efırde kórinbeı ketken janr. Shyǵarmashylyq ujym jaz boıy ár aımaqtaǵy shalǵaı eldi mekender men óndiris oshaqtaryn aralap shyǵypty. Munda eńbek adamdarynyń beınesi aıqyn kórsetilgen. Bul – Memleket basshysy Joldaýynda aıtqan eńbek adamdarynyń rólin dáripteýdiń mysaly.
Zań shyǵarýshy organ Parlamenttiń jumysyna arnalǵan «Qos palata» habarynda jýrnalıst Irına Sovetjanqyzy depýtattyq saýaldardaǵy máselelerdi keńinen tarqatyp, kórermenderge quqyqtyq bastamalardyń jaı-japsaryn túsindiredi. Kishkentaı kórermender men olardyń ata-analaryna arnalǵan dúnıeler de nazardan tys qalmaǵan. Osyndaı jobalardyń biri – «Dara bala» habary. Elimizdegi eń talantty balalardy bir alańǵa biriktirgen jobaǵa arnaıy irikteýden ótken jas ónerpazdar, bilim, ǵylym, óner, sport salalaryndaǵy daryndy balalar qatysady.
Korporasııanyń jańa maýsymǵa daıyndaǵan qomaqty dúnıesiniń biri – telehıkaıalar óndirisi. Atap aıtsaq, ulttyq arna kórermenderge 11 premera usynbaq. Jalpy bólim sany 150 serııa bolatyn jańa telehıkaıalar arasynda týrızm, ınklıýzııa, sport pen medısına, qutqarýshylar taqyrybyna, otbasylyq qundylyqtardy dáripteýge baǵyttalǵan drama, melodramalar, Qazaq teatrynyń 100 jyldyǵyna arnalǵan «Sham túbindegi shyndyq», 1930-1940 jyldardaǵy mádenı kezeńge, sol zamandaǵy Ahmet Jubanov bastaǵan qazaq kásibı mýzyka óneriniń kórnekti tulǵalaryna arnalǵan «Jel ústindegi vals», Jeńistiń 80 jyldyǵyna oraı Saıyn Muratbekov shyǵarmasynyń jelisimen túsiriletin «Jabaıy alma» tarıhı telehıkaıalary bar. Sonymen qosa bıyl korporasııa Berdibek Soqpaqbaevtyń «On alty jasar chempıon» shyǵarmasyn ekranızasııalaıdy. Osy arqyly shyǵarmashylyq ujym qalamgerlerdiń murasyn da dáripteıdi. Derekti fılm janry da jańǵyrtylyp, tyń týyndylar túsirilmek.
«Shyǵarmashylyq komanda jańa maýsymda ulttyń jańa sapasyn qalyptastyrýǵa qajetti qundylyqtardy dáripteıtin baǵdarlamalarmen qosa, eldegi eleýli oqıǵalarǵa, mańyzdy datalar men ózge de ózekti taqyryptarǵa arnalǵan telehıkaıalar men derekti fılmder usynady. «Qazaq qyzy» serııasymen shyǵatyn derekti jobalarymyzda Ǵaınıjamal Dýlatova, Zeınep Bókeıhanova, Názıpa Quljanova, Gúlsim Asfendııarova, Aqqaǵaz Dosjanova, Múbıná Nııazova sekildi ár saladan shyqqan tuńǵysh qaıratker áıelderdiń eńbekterin nasıhattaýdy maqsat ettik. Keler jyly bul sıkldi tarıhı telehıkaıaǵa aınaldyrýdy josparlap otyrmyz», dedi «Qazaqstan» RTRK» AQ basqarma tóraıymy Lázzat Tanysbaı.
Saıası-qoǵamdyq baǵyttaǵy «Ashyq alań», «Álem jáne biz», «Jedel jeli», «Bas taqyryp» jobalary, medısınalyq keńes beretin «Teledáriger», otbasy tatýlyǵynyń syryn kórsetetin «Tatý-tátti», áskerı-patrıottyq baǵyttaǵy «Aqsaýyt», tikeleı efırde kúnniń rezonansty oqıǵalaryn taldaýǵa arnalǵan «1001 tún» jobalary jańa maýsymda da jalǵasady.
Shyǵarmashylyq keshke qatysqan aqparat salasynyń ardageri, memleket jáne qoǵam qaıratkeri Qýanysh Sultanov aýdıtorııa suranysyna jaýap beretin baǵdarlamalar molaıýyna barlyq medıa múddeli bolýǵa tıis ekenin aıtady. «Qazaqstan» arnasy – qoǵam ózgeristeri men ult tarıhyndaǵy jańa paraqtarǵa únemi mán berip otyratyn úlken ujym. Rýhanııat pen qundylyqtarymyzdy ulyqtaýda jańashyldyǵymen, zor izdenisimen kósh basynda júredi», dep atap ótti.
Korporasııa quramyndaǵy «Abai tv» telearnasynan klassıkalyq mýzyka men teatrdaǵy álemdik deńgeıdegi týyndylardy tereń taldaıtyn «Arnaý», zııatkerlik baǵyttaǵy «Oımergen», kitap oqý mádenıetin qalyptastyrýdy kózdeıtin «Meniń kitaphanam» jańa habarlary efırge shyǵady. «Balapan» telearnasy kishkentaı kórermenderge 20-ǵa jýyq jańa joba men mýlthıkaıalar usynady. Onyń ishinde mektep jasyna deıingi balalar arasyndaǵy «iBars» zııatkerlik televızııalyq baıqaýy, balalardy ǵylymǵa baýlýdy kózdeıtin «Ǵylymǵa saıahat», ata-analarymen birlese saıysqa túsetin «Oızerek» tanymdyq jobasy bar.
Jańa televızııalyq jobalardan bólek, «Qazaqstan» teleradıokorporasııasy jyl sońyna deıin «Altyn qordaǵy» qundy aýdıoshyǵarmalar jınaqtalǵan 6 bólimdi «Asyl mura» jınaǵyn, sport jýrnalısteri men kommentatorlaryna arnalǵan «Kommentatorlar sózdigin» jaryqqa shyǵarady.