QOSTANAI. 28 sáýir. Qostanaıdaǵy Sport saraıynda jeńimpazdar forýmy ótti. Bul týraly egemen.kz tilshisi habarlady.
Sport saraıy qostanaılyqtarǵa lyq toldy. Kenshiler, mashına jasaýshylar, stýdent jastar «Alǵa, Qazaqstan» dep jar salady. Saılaý Qostanaıda da saılaýshylardyń belsendiligimen ótti. «Syrtkóz-synshy» degendeı, oǵan shetelderden kelgen baıqaýshylardyń qaısysy bolsa da tańqalyp ketti. Ortalyq saılaý komıssııasynyń málimeti boıynsha, 26 sáýir kúni ótken Qazaqstan Prezıdentiniń kezekten tys saılaýynda Nursultan Nazarbaevqa saılaýshylardyń 97,7 paıyzy daýys berdi.
Máńgilik el» ıdeıasy, «Nurly jol» ekonomıkalyq strategııasy Qazaqstandy gúldentip, álemniń ozyq 30 eliniń qataryna qosý maqsaty jalǵasyn tabatyn bolady. Forýmda N.Nazarbaev kandıdatýrasyn usynǵan «Nur otan» partııasynyń oblystyq fılıaly tóraǵasynyń orynbasary Á.Saparova saılaý birlik pen abyroıdyń kórinisi bolǵanyn aıtty. Munan keıin oblys ákimi Nuraly Sádýaqasov: «Halyqaralyq baıqaýshylar men saıasatkerler Qazaqstan Prezıdenti saılaýynyń móldir jáne óte joǵary dárejede ótkenin moıyndap otyr. Nursultan Nazarbaevqa qazaqstandyqtardyń 97,7 paıyzy senim bildirdi. Dúnıejúzinde saılaýshylar daýysynyń mundaı paıyzyn alǵan eshkim joq. Bul halyqtyń súıikti prezıdentine degen joǵary senimi bolyp tabylady. Qazaqstan halqy óziniń tastúıin birligin taǵy da dáleldedi. Osyndaı birlikpen Qazaqstan alǵa basa bersin!» dedi.
Munan keıin A.Baıtursynov atyndaǵy Qostanaı memlekettik ýnıversıteti rektorynyń keńesshisi Mıhaıl Dáýenov, Qazaqstan halqy assambleıasynyń múshesi, oblystyq arhıv dırektory Valerıı Vıshnıchenko, halyq aqyny Ásııa Berkenova taǵy basqalar sóz aldy. Zaldaǵy jınalǵan jurtshylyq ókilderi, jumysshylar, jastar lebizderdi «Alǵa, Qazaqstan!», «Nursultan, Qazaqstan!» dep qýattap, qoldap otyrdy. Forým patrıottyq ándermen kórkemdeldi.
Názıra Járimbetova.
Derek, sýret: egemen.kz