Elimizde strestik aktıvterdi satýǵa arnalǵan alǵashqy sıfrlyq platforma – DMAS iske qosyldy. Bul týraly Almatyda ótken Central Asia FinTech Summit 2024 forýmynda habarlandy. Bastama Memleket basshysynyń strestik aktıvterdi ekonomıkalyq aınalymǵa naryqtyq negizde qaıtarý jónindegi tapsyrmasy aıasynda júzege asty.
Qarjy naryǵyn retteý jáne damytý agenttiginiń tóraǵasy Mádına Ábilqasymovanyń aıtýynsha, bul – problemalyq aktıvterdi ekonomıkaǵa qaıtarýǵa yqpal etetin, ınvestorlar arasynda senimniń ósýin yntalandyratyn mańyzdy qadam.
«Memleket basshysynyń tapsyrmasyn iske asyrý úshin bıyl maýsymda akkredıttelgen sıfrlyq platformalar arqyly ǵana strestik aktıvterdi satýdy kózdeıtin zań qabyldandy. Zańdy iske asyrý úshin Agenttik sıfrlyq platformalardyń qyzmetine ruqsat berý tártibin, osy platformalarda saýda-sattyq ótkizý qaǵıdalaryn, sondaı-aq aqparattyq jáne kıberqaýipsizdik standarttaryn reglamentteıtin normatıvtik-quqyqtyq aktilerdi qabyldady», dedi Mádına Ábilqasymova.
Onyń sózinshe, strestik aktıvter saýdasyn sıfrlandyrý naryqtyń ashyqtyǵyn qamtamasyz etetin, ınvestorlardy kóbirek tartatyn, bank sektoryn strestik aktıvterden tazartýdy yntalandyratyn mańyzdy naryqtyq tetikke aınalady. DMAS – strestik aktıvtermen saýda jasaý úderisin jeńildetetin jáne jedeldetetin zamanaýı sıfrlyq platforma. Júıe kredıtter men óndirilgen múlikti qosa alǵanda, aktıvterdiń keń aýqymyna qol jetkizýdi qamtamasyz etedi.
Saýda-sattyqty avtomattandyrý úderisti ashyq ári ádil etedi, al agenttik bekitken qaǵıdalar barlyq qatysýshynyń múddesin qorǵaýdy qamtamasyz etpek. Mámileler onlaın rejimde resimdeledi, bul operasııalardyń yńǵaılylyǵy men boljamdylyǵyn arttyrady.
Aıta keteıik, 2017 jyldan bastap qabyldanǵan sharalar nátıjesinde bank sektoryndaǵy strestik aktıvter 2024 jylǵy shildege qaraı 7,7 trln teńgeden 3,2 trln teńgege deıin tómendedi. Bul rette tólem merzimi 90 kúnnen asa keshiktirilgen kredıtter deńgeıi eń tómengi mánge jetip, shamamen 1 trln teńgeni qurady.
Agenttik tóraǵasy qarjy retteýshisi bankterdi problemalyq kredıtterden arylýǵa yntalandyrý boıynsha josparly jumys júrgizgenin atap ótti.