Astanada múgedektigi bar adamdardyń quqyqtary týraly BUU konvensııasyn iske asyrý aıasynda halyqaralyq semınar bastaldy. Oǵan halyqaralyq uıymdar men memlekettik organdardyń ókilderi qatysady.
Úsh kúnde qatysýshylar múgedektigi bar adamdardy qorǵaý júıelerin engizýdiń sátti mysaldarymen bólisedi. Inklıýzııa salasynda túrli eldiń aldynda turǵan syn-qaterlerdi talqylaıdy. Ári olardy sheshý úshin usynymdar ázirleıdi. Osylaısha, BUU men Eńbek jáne halyqty áleýmettik qorǵaý mınıstrligi uıymdastyrǵan semınar múgedektigi bar adamdardyń quqyn qorǵaý máselelerin talqylaý, ınklıýzıvti saıasatty jaqsartý jolynda oń sheshim tabatyn negizgi alańǵa aınalady.
Halyqaralyq múgedekter uıymdary odaǵynyń tóraǵasy Vasılıı Nazarenko semınarǵa joǵary baǵa berip, elimizde ázirlenip jatqan 2030 jylǵa deıingi ınklıýzıvti saıasat tujyrymdamasynyń múgedektigi bar adamdardyń búkil qaýymdastyǵy úshin mańyzdylyǵyn atap ótti. Al semınardyń úshinshi sessııasynda Eńbek jáne halyqty áleýmettik qorǵaý mınıstri Svetlana Jaqypova Halyqaralyq múgedekter uıymdary odaǵynyń múshelerimen kezdesti. Talqylaýdyń basty taqyryby Qazaqstannyń BUU Múgedekterdiń quqyqtary týraly konvensııasynyń oryndalýy týraly birinshi baıandamasyn qorǵaý qorytyndylary boldy. Svetlana Jaqypova múgedektigi bar adamdar uıymdarynyń halyqaralyq odaǵynyń ókilderine uzaqmerzimdi yntymaqtastyǵy úshin alǵys aıtyp, semınar sheńberinde josparlanǵan kezdesýlerge tabys tiledi.
«2015 jyly elimiz Múgedekterdiń quqyqtary týraly konvensııany ratıfıkasııalady. Qoldanystaǵy zańnamany túgendeý nátıjeleri boıynsha 2015 jyly 3 jeltoqsanda «Qazaqstan Respýblıkasynyń keıbir zańnamalyq aktilerine múgedekterdiń quqyqtaryn qorǵaý máseleleri boıynsha ózgerister men tolyqtyrýlar engizý týraly» zań qabyldandy. Múgedektigi bar adamdarǵa áleýmettik jáne kólik ınfraqurylymynyń qoljetimdiligin qamtamasyz etýge qatysty 24 zańǵa túzetýler engizildi. Byltyr konvensııaǵa fakýltatıvtik hattama ratıfıkasııalandy, Áleýmettik kodeks qabyldandy», dedi mınıstr S.Jaqypova.
Kezdesý barysynda Germanııanyń Federaldy eńbek jáne áleýmettik ister departamentiniń basshysy Torsten Eınstmann Inklıýzıvti eńbek naryǵy jáne múgedekter teńdigi týraly zań jaıynda aıtty. Al Armenııanyń Biryńǵaı áleýmettik qyzmet bóliminiń basshysy Rımma Eganıan Armenııadaǵy múgedektikti baǵalaýdyń jańa júıesiniń tıimdiligi týraly habardar etti. Endi 11 qazanda semınar qorytyndysy boıynsha halyqaralyq jáne memlekettik uıymdar músheleri birneshe eldiń úkimettik organdaryna usynymdaryn usynady.