Qyrkúıek aıynyń basynda Mańǵystaý oblysy Munaıly aýdanynyń №8 mektebinde oqýshylar jappaı ýlanyp aýrýhanaǵa túsken edi. Búgin Májilis kýlýarynda Oqý-aǵartý mınıstri osy oqıǵaǵa baılanysty kinálilerdiń jaýapqa tartylǵanyn málimdedi, dep jazady Egemen.kz.
Ǵanı Beısembaevtyń aıtýynsha, oqýshylar jappaı ýlanǵan mektepti ystyq tamaqpen qamtýy tıis bolǵan kásipker mundaı isterden shettetilgen.
«Tamaqtaný máselesine baılanysty ony uıymdastyrǵan kásipkerlerdiń jaýapkershiligi máselesin únemi kóterip kelemin. Naqty Mańǵystaý oblysy boıynsha tamaqtandyrýmen aınalysqan kásipker mektepten alastatyldy. Meniń bilýimshe, budan bylaı bul kásipkerdiń qandaı da bir mektepke aralasýyna shekteý qoıyldy. Odan bólek, tıisti jaýapty tulǵalar jaýapkershilikke tartyldy. Bilim basqarmasynyń basshysy jumystan ketti, ákim orynbasary jaýapqa tartyldy, oǵan qosa kásipkerlermen kelisimshart toqtatylyp, basqa kásipkerge almastyryldy», dedi Oqý-aǵartý mınıstri.