Astanadaǵy Qazaq agrotehnıkalyq zertteý ýnıversıtetinde Sáken Seıfýllın atyndaǵy ǵylymı-zertteý ortalyǵy ashyldy. Atalǵan ýnıversıtet rektory, UǴA akademıgi Qanat Tireýovtiń bastamasymen ortalyq Gýmanıtarlyq fakýltettiń Qazaq jáne orys tilderi kafedrasynyń janynan qurylyp otyr.
Ortalyq Sáken Seıfýllın-niń ádebıettaný, folklorlyq, lıngvıstıkalyq, mýzykalyq, tarıhı zertteýlerin, túriktanýdaǵy eńbekterin pedagogıkalyq baǵytta jańasha kózqaras turǵysynan zerdelep, jan-jaqty zertteýdi kózdeıdi. Sonymen qatar halyq sharýashylyǵyn uıymdastyrýdaǵy, halyq aǵartý salasyndaǵy, mádenıet, baspa isin damytýdaǵy, sot júıesi, kedendik qyzmettiń iske asýyndaǵy, qarjylyq júıe men salyq salasyn bir júıege keltirýde atqarǵan eńbekterin nasıhattaıdy.
S.Seıfýllın atyndaǵy ǵylymı-zertteý ortalyǵynyń jetekshiligine qazaq jáne orys tilderi kafedrasynyń meńgerýshisi, pedagogıka ǵylymdarynyń kandıdaty, qaýymdastyrylǵan professor Ardaq Tileýlesova taǵaıyndaldy.
Astana qalasyndaǵy Sáken Seıfýllın atyndaǵy murajaı dırektory, tarıh ǵylymdarynyń doktory, professor Marat Ábsemetov ortalyqqa S.Seıfýllın mýzeıinen shyqqan «Syrsandyq» serııasynyń 10 tomdyǵyn syıǵa tartty. Sonymen qatar akademık E.Bóketov atyndaǵy Qaraǵandy zertteý ýnıversıtetiniń professory, fılologııa ǵylymdarynyń doktory Sh.Jalmahanov, ǵalym, dramatýrg Ǵ.Eshtanaev, fılologııa ǵylymdarynyń doktory, professor J.Jaqyp júrekjardy lebizderin bildirdi.
Sonymen qatar munda tarıh ǵylymdarynyń doktory, professor Ǵ.Alpysbaevanyń jetekshiligimen, Qazaqstan tarıhy kafedrasy ǵalymdarynyń qurastyrýymen shyqqan «Sáken joly» atty kitaptyń tusaýkeseri ótti.
Ýnıversıtettiń ǵylymı áleýetin damytýǵa baǵyttalǵan bul mańyzdy qadam – professor-oqytýshylar quramyna, ásirese jas ǵalymdar men zertteýshilerge ǵylymı jobalarymen aınalysýǵa, mádenıet pen ǵylymnyń kúrdeli aspektilerin tereń zertteýge úlken múmkindik.