Oral turǵyny anasynyń ólimi úshin aýrýhanadan 2 mln teńge ótemaqy óndirip aldy. Bul týraly Joǵarǵy sot saıtynda jarııalandy.
2019 jyly jedel járdem brıgadasy dene qyzýy kóterilip, jalpy álsizdikpen 76 jastaǵy áıeldi Oral qalalyq aýrýhanasyna jetkizgen. Dárigerler sozylmaly bronhıt pen pnevmonııa degen dıagnoz qoıyp, terapııa bólimine jatqyzǵan. Em nátıje bermeı, naýqastyń jaǵdaıy aýyrlaǵan. Kompıýterlik tomografııa plevrıt degen kúdikti kórsetken. 4 aptadan keıin naýqastyń jaǵdaıy nasharlaýyna baılanysty oblystyq aýrýhanaǵa jetkizilip, sol jerde qaıtys bolǵan.
Qaıtys bolǵan áıeldiń uly Densaýlyq saqtaý basqarmasyna dárigerlerdiń salǵyrttyǵy men tıisti em qabyldamaǵany týraly shaǵymmen júgingen. Tekserý barysynda aýrýhana tarapynan zań buzýshylyq anyqtalǵan. Tekserý materıaldary Batys Qazaqstan oblystyq polısııa departamentine joldanyp, qylmystyq is qozǵalyp, qylmystyq quqyq buzýshylyq quramynyń bolmaýyna baılanysty birneshe ret toqtatylyp, prokýratýra kúshin joıǵan.
Densaýlyq saqtaý basqarmasy qalalyq aýrýhananyń qarsylyǵyn qabyldamaǵandyqtan, marqumnyń uly aýrýhanadan moraldyq shyǵyndy óteý týraly Oral qalasynyń №2 sotyna shaǵym túsirgen. Ol anasynyń ólimine sapasyz medısınalyq kómek pen qalalyq aýrýhana dárigerleriniń áreketsizdigi sebep bolǵanyn atap ótken. Sondaı-aq talap qoıýshynyń anasy emdelip jatqan aýrýhananyń terapııa bóliminde jalpy praktıkalyq dárigerdiń kýáligi bar maman jumys istegeni, oǵan quqyǵy joq ekeni týraly fakt anyqtaldy.
Sarapshy naýqasqa onyń jasy men onda bar sozylmaly aýrýlary, sonyń ishinde, búırektiń jedel zaqymdanýyn týdyrǵan antıbıotıkter eskerilmeı, dári-dármek taǵaıyndalǵanyn anyqtady. Tıisti bakterııaǵa qarsy preparattar men gemodıalızdi engizý naýqastyń ómirin uzartýy múmkin edi.
Sot medısınalyq qujattardy, sarapshylyq qorytyndylardy jáne tekserý aktisin eskere otyryp, der kezinde qaıtalama synaqtar ótkizbeý, naýqastyń jaǵdaıyn durys baǵalamaý, emdeýdi kesh túzetý, nefrologtiń keńesiniń ýaqytynda bolmaýy men konsılıýmnyń kesh júrgizilýi aýrýdyń nátıjesine áser etkenin, ólimge ákelip soqqanyn anyqtady.
Osy aıtylǵandardyń negizinde talap qoıý ishinara qanaǵattandyryldy: talap qoıýshynyń paıdasyna aýrýhanadan 2 mln teńge moraldyq shyǵyn óndirildi. Sheshim zańdy kúshine engen joq.