Shymkentte balabaqsha tárbıeshisi búldirshindi uryp-soǵyp, aıaǵynan súıregeni úshin qylmystyq jaýapqa tartylmaıtyn boldy. Ol bastapqyda «tárbıeleý mekemesi jumyskeriniń kámeletke tolmaǵan balaǵa qatygezdik kórsetý» baby boıynsha aıyptalǵan. Sotta onyń kinási tolyq dáleldengenimen, tárbıeshi men jábirlenýshi taraptyń tatýlasýyna baılanysty qylmystyq is toqtatyldy, dep habarlaıdy Egemen.kz.
«Sottalýshy óz kinásin moıyndap, shynaıy ókinish bildirip, jábirlenýshiniń zańdy ókilinen keshirim surady. Materıaldyq jáne moraldyq shyǵyndy tolyq ótegen soń, taraptar tatýlasty. Osyǵan baılanysty sot Qylmystyq kodekstiń 68-baby 1-bóligine sáıkes, qylmystyq isti toqtatyp, sottalýshyny qylmystyq jaýapkershilikten bosatty», dep habarlady Shymkent qalalyq sotynyń baspasóz qyzmeti.
Aıta keteıik, bul oqıǵa qyrkúıek aıynda bolǵan. Áleýmettik jelilerde taraǵan beınejazbada tárbıeshiniń búldirshindi belgisiz zatpen uryp, aıaǵynan súıregeni kórsetilgen. Oqıǵa bolǵannan keıin tárbıeshi jumystan shyǵarylyp, qylmystyq is qozǵalǵan edi.
Sot úkimi áli zańdy kúshine engen joq.