Respýblıka kúnine oraı, máslıhattardyń 30 jyldyǵy aıasynda «Elorda Aqparat» medıaholdınginiń uıymdastyrýymen ótken jýrnalıster men jazýshylar arasyndaǵy bılıard jarysy óz máresine jetti.
Osymen úshinshi ret uıymdastyrylǵan týrnırge belgili aqyn-jazýshylar, jýrnalıster, medıa menedjerler, qoǵam qaıratkerleri, zııaly qaýym men baspasóz ókilderi qatysty.
Jarystyń bas tóreshisi belgili qalamger, sport jýrnalıstıkasynyń korıfeıi Nesip Júnicbaıuly boldy. Jarysqa qatysýshylarǵa qomaqty júlde qorynan bólek arnaýly syılyqtar berildi. «Mádenıetti oıynshy» atalymy qoǵam qaıratkeri Darhan Myńbaıǵa, «Mergen oıynshy» atalymy Parlament Májilisiniń depýtaty Janarbek Áshimjanǵa, «Sheber oıynshy» atalymy ardager jýrnalıst Kenje Jumaǵulovqa, «Úzdik dýplet» atalymy Talǵat Eshenulyna buıyrdy.
«Astana aqshamy» gazetiniń bir jyldyq tegin jazylymyna bılıard týrnırine ádil qazylyq jasaǵan Nesip Júnisbaıuly ıe boldy. Úzdik oıyn kórsetken Aıaǵan Sandybaıulyna «Vechernıaıa Astana» gazetiniń gramotasy tabystaldy. Sonymen qatar nomınanttar Qazaqstan máslıhattarynyń 30 jyldyq merekelik medalimen marapattaldy.
Fınalǵa shyqqan ardager jýrnalıst, aqyn Turmaǵanbet Erdeshuly men aqyn, Jazýshylar odaǵy Astana fılıalynyń ókili Dáýletkereı Kápuly arasyndaǵy oıyn tartysqa toly boldy. Nátıjesinde, jarystyń bas júldesi Dáýletkereı Kápulyna buıyrsa, ekinshi oryn Turmaǵanbet Erdeshulynyń qanjyǵasyna baılandy. Chempıon – 500 myń, ekinshi oryn ıesi 300 myń teńge aqshalaı júldemen marapattaldy.
«Respýblıka kúniniń joǵary dárejede toılanýy barshamyzdyń egemendikke degen qurmetimizdi bildiredi. Oıyn barysyna kelsek, toptyq irikteýden shyqqan soń, birinshi kezeńde aıtysker Erkebulan Qaınazardy, ekinshi kezeńde Bazarbek Túkibaıdy utyp, jartylaı fınalda jarystyń basty favorıtteriniń biri Ahmet Qaıratulynan aıla asyrdym. Sóıtip, fınalda aqyn, ardager jýrnalıst Turmaǵanbet Erdeshulyn utyp, jeńiske jettim. Osyndaı jarystardy uıymdastyryp turý qalamgerlerdi, ardagerler men jastardy jaqyndastyrady», dedi Dáýletkereı Kápuly.
Úshinshi oryndy Eýrazııa ulttyq ýnıversıteti baspasóz qyzmetiniń jetekshisi Erbol Erdenbek pen «Habar» arnasynyń qyzmetkeri Ahmet Qaıratuly ózara bólisti. «Mundaı jarystar – kúndelikti qarbalastan tys qarym-qatynas ornatýǵa, aǵa býyn men jas áriptester arasynda sabaqtastyqty jalǵastyrýǵa jaqsy negiz. Bılıard týrnırin jyl saıyn, dástúrli túrde uıymdastyryp kele jatqan «Elorda Aqparat» medıaholdınginiń basshysy Oljas Sydyqbekke alǵys bildiremiz», deıdi qatysýshylar.