Soltústikqazaqstandyq M.Qozybaev ýnıversıteti stýdentteri 1 200 adamǵa shaqtalǵan jańa jataqhanaǵa qol jetkizip, qýanyp qaldy. Munda stýdentter ǵana emes, otbasylary shaǵyn quramdaǵy jas ustazdar da turady.
«Buǵan deıin 1970–1980 jyldary salynǵan 4 jataqhanamyz boldy. Olardyń barlyq syıymdylyǵy 1 365 oryn ǵana edi. Ishi tar, aınalymǵa kelmeıtin. AQSh-tan kelgen áriptesterimizge olardy kórsetýge de uıalýshy edik. Endi myna jataqhanamyzdyń arqasynda 2 700 stýdent jataqhanaǵa qol jetkizedi. Áriptesterimizge de uıalmaı kórsete alamyz. Bul bizge stýdentter kontıngentin 9-10 myńǵa deıin arttyrýymyzǵa múmkindik beredi», deıdi ýnıversıtet rektory Erbol Isaqaev.
Al «Bereke» shaǵyn aýdanynda ashylǵan densaýlyq-saýyqtyrý kesheninde jastar voleıbol oınap, kúres pen boksqa qatysa alady. Qalyń kópshilikke arnalǵan jattyǵý zaly da bar. Aýdanda 35 myńdaı turǵyn bar, sonyń negizgi bóligi – jastar. Baıyrǵy sportshy, klassıkalyq kúresten qazaqtar arasynan oblysta eń birinshi bolyp sport sheberi normatıvin oryndaǵan Jambyl Tasemenov aǵa kópshilikti sport saraıynyń ashylýymen quttyqtady.
«Petropavl qalasynda turyp jatqanyma – 62 jyl. Dál mundaı sport saraıy buryn bizde bolǵan emes. Kúres pen bokstyń oblysymyzda kenjelep qalýynyń sebebi de sol. Endi myna saraıda jańa sport juldyzdary jarqyraıtyn shyǵar degen úmit mol», dedi ardager.
Sondaı-aq óńir ortalyǵynda jańa tennıs ortalyǵy da boı kóterdi. Ashylǵan bette ústel tennısinen oblys chempıonaty ótti.
Soltústik Qazaqstan oblysy