Aqtóbe oblysynda Qarjylyq monıtorıng agenttigi «World Business Consulting» qarjy (ınvestısııalyq) pıramıdasyn qurý jáne onyń qurylymdyq bólimshesin basqarý faktisi boıynsha sotqa deıingi tergeýdi aıaqtady, dep habarlaıdy Egemen.kz.
Vedomstvo málimetinshe, olar ózderin Qazaqstanda resmı tirkelgen halyqaralyq ınvestısııalyq kompanııa ókilderi retinde tanystyryp, Aqtóbede prezentasııalar ótkizgen.
«Jıyndarda kúdiktiler qarjylyq ınvestısııalar, tıimdi paıyzben nesıe rásimdeý, álemniń kez-kelgen jerinen páter jáne jańa kólik satyp alý jaıly aqparattarmen azamattardy qyzyqtyrǵan. Osy arqyly jańa salymshylardy tartyp, olarǵa aı saıyn aqsha salyp odan syıaqy alatynyna sendirgen», delingen habarlamada.
Nátıjesinde, kúdiktilerdiń zańsyz áreketinen 60 mln teńgege jýyq shyǵyn keltirilgen. Sot úkimimen eki azamat kináli dep tanylyp, bes jylǵa shartty túrde bas bostandyǵynan aıyryldy. Al, jábirlenýshilerge keltirilgen zalal tolyq kólemde ótelgen.
«Jyl basynan beri QMA qarjy pıramıdalaryn qurý jáne basqarý faktileri boıynsha 62 qylmystyq is aıaqtaldy, olardyń uıymdastyrýshylary 20 mlrd teńgege jýyq shyǵyn keltirdi.Búgingi tańda 13 mlrd teńgeden astam qarajat óteldi.Qarjy pıramıdalarynyń qyzmetin uıymdastyrǵany jáne jarnamalaǵany úshin, 53 adamǵa qatysty 35 sot úkimi shyqty. Olar 2 jyldan 9 jylǵa deıingi merzimge sottaldy», dep habarlady vedomstvo ókilderi.Aıta keteıik, qarjy pıramıdalarynyń belgileri bar 10,7 myń saıt pen silteme buǵattaýǵa joldanǵan. «WhatsApp», «Telegram» jáne «Instagram» - da 300-ge jýyq chat buǵattalǵan. Bul áreketter 2 mln-nan astam áleýetti salymshylardyń qarjylyq shyǵyndarynyń aldyn aldy.