Sý resýrstary jáne ırrıgasııa mınıstrligi sybaılas jemqorlyqpen kúresýge baǵyttalǵan is-sharalardy belsendi túrde engizip jatyr. Basty maqsat – saladaǵy barmaq basty, kóz qysty árekettiń aldyn alý, mınıstrlik qyzmetkerleri arasynda adaldyq pen ashyqtyq mádenıetin qalyptastyrý.
Mınıstrlik Sybaılas jemqorlyqqa qarsy is-qımyl agenttigimen birlese otyryp, 2022–2026 jyldarǵa arnalǵan sybaılas jemqorlyqqa qarsy saıasat tujyrymdamasyn júzege asyryp keledi. Jospar aıasynda negizgi sharalar bekitilip, joba kartasy ázirlendi. Sondaı-aq sybaılas jemqorlyq táýekelderin júıeli túrde taldaý júrgiziledi. Al ashyqtyqty qamtamasyz etý úshin ınternet resýrsta «Sybaılas jemqorlyq kartalary» bólimi qurylyp, ishki jáne syrtqy taldaýlardyń nátıjeleri turaqty jarııalanyp otyrady.
«Mınıstrlik qyzmetkerleri arasynda sybaılas jemqorlyqqa qarsy mádenıetti qalyptastyrý maqsatynda oqytý baǵdarlamalary belsendi engizilip jatyr. Oqý kýrstary bilimdi tekserýge arnalǵan testileý kezeńderin qamtıdy. Bul árbir qyzmetkerge qajetti bilim alýǵa ári olardyń deńgeıin baǵalaýǵa múmkindik beredi. Sybaılas jemqorlyqqa qarsy is-qımyl mınıstrliktiń barlyq deńgeıinde – ortalyq apparattan bastap aýmaqtyq bólimshelerge deıin júzege asyrylady. Memlekettik qyzmetke alǵash ret kelgen qyzmetkerlerge etıkalyq normalar men zańdardy saqtaý qajettiligi týraly túsindirý jumysyna erekshe nazar aýdarylady. Bul memlekettik qurylymdarǵa azamattardyń senimin arttyrýǵa yqpal etedi. Osylaısha, sybaılas jemqorlyqqa qarsy is-qımyl sharalary júıeli túrde jalǵasyn taýyp, mınıstrliktiń turaqty baqylaýynda bolady», dedi Sý resýrstary jáne ırrıgasııa mınıstrliginiń ádep jónindegi ýákili Rýstam Beısenqulov.