Almatyda ashylǵan «Kazakhstan Mobility Engineering» zaýyty qazaq tili ıntegrasııalanǵan avtomobılderge arnalǵan mýltımedııalyq júıelerdi shyǵarady. Mundaı júıelerdiń birinshi partııasy Tucson, Elantra jáne Palisade modelderine ornatý úshin Hyundai Trans Kazakhstan zaýytyna kelip tústi. Endi Qazaqstanda shyǵarylatyn Hyundai avtomobılderi qazaq tilindegi ınterfeısti usyna otyryp, jergilikti paıdalanýshylardyń qajettilikterine jaýap bere alady, dep habarlaıdy Egemen.kz.
Jańa óndiris Memleket basshysynyń «Ádiletti Qazaqstan: quqyqtyq tártip, ekonomıkalyq órleý, qoǵamdyq optımızm» atty Joldaýynda qoıylǵan talaptarǵa tolyqtaı jaýap beredi. Prezıdent otandyq shıkizat pen quramdas bólikterdi paıdalanyp ónerkásiptik áleýetti tolyq ashatyn júıeli tásil qajet ekenin atap ótken bolatyn.
Avtomobıl ónerkásibiniń ósýi Qazaqstannyń ındýstrııalyq saıasatynyń negizgi baǵyttarynyń birine aınalyp keledi. Zaýyttyń iske qosylýy iri ónerkásiptik nysandardyń tóńireginde óńdeýdiń joǵary satylaryn damytýǵa jáne sabaqtas óndiristerdi qurýǵa baǵyttalǵan qadamdardyń biri bolyp tabylady. Kompanııa «Astana Motors» kompanııasynyń quramyna kiredi jáne ońtústik koreıalyq seriktesi Motrex Co Ltd tehnologııalaryn paıdalana otyryp jumys isteıdi.
«Mýltımedııalyq júıeler – bul sıfrlyq tehnologııalar men ınjınırıng salasyndaǵy birinshi dárejeli mamandardyń quzyrettiligin talap etetin joǵary dáldiktegi óndiris. Bizdiń basty maqsatymyz – joǵary lokalızasııalanǵan óndiris sıklin qurý. Al biz otandyq shıkizat pen komponentterdi barynsha paıdalanamyz. Sondyqtan «Kazakhstan Mobility Engineering» zaýytynyń el úshin mańyzy zor», dedi zaýyttyń ashylý saltanatynda Indýstrııa jáne qurylys mınıstri Qanat Sharlapaev.
Otandyq taýar óndirýshilerdi qoldaý aıasynda Úkimet keshendi sharalardy júzege asyryp keledi. Avtomobıl ónerkásibinde Memleket basshysynyń tapsyrmasyna sáıkes salanyń turaqty ósýine jáne syrtqy naryqtaǵy ónimniń básekege qabilettiligin arttyrýǵa yqpal etetin klasterlik óndiristi damytý boıynsha jumystar júrgizilip jatyr.
Sonymen qatar, aýylsharýashylyq mashına jasaý salasynda bıylǵy jyly ımporttyq analogtardy sýbsıdııalaý alynyp tastaldy, jabdyqtyń lızınginiń paıyzdyq mólsherlemesin sýbsıdııalaý boıynsha saralanǵan tásil – otandyq tehnıka úshin tómenirek qarastyryldy. Temirjol mashına jasaý salasynda qoljetimdi lızıngtik qarjylandyrý tetigi iske qosyldy, sonyń arqasynda 2024 jyly óndiris 1,5 esege ósti.
«Kazakhstan Mobility Engineering» zaýyty Almatynyń Indýstrıaldy aımaǵynda ornalasqan. Kásiporyn 100 myń sharshy metr aýmaqta avtokólik bólshekterin shyǵaratyn iri tehnoparktiń bir bóligine aınalady. Bul joba óndiristi lokalızasııalaýǵa jáne qazaqstandyq avtomobıl ónerkásibin qoldaýǵa baǵyttalǵan. Sondaı-aq Almaty ındýstrıaldy aımaǵy aýmaǵynda avtokreslolar, avtokólikterge arnalǵan rezeńke jáne plastmassa buıymdaryn shyǵaratyn zaýyttar men logıstıkalyq habty iske qosý josparlanǵan.
Tehnoparktiń tehnıkalyq óndiristik qýaty jylyna shamamen 100 myń komplekt bolady. Klaster aýmaǵynda 90-nan astam maman jumys isteıdi, al óndiristik keshenniń shtaty 400-ge jýyq adamdy quraıdy.