«Qazaqstan barysy» týrnıri – jyl saıyn elimizdegi úzdik balýandardyń basyn qosatyn, dástúrge aınalǵan dúbirli doda. Bıylǵy týrnırge elimizdiń barlyq óńirlerinen 42 úzdik balýan qatysyp, baq synasty.
Abaı oblysynyń ákimi Nurlan Uranhaev «Qazaqstan barysy» týrnıriniń bıylǵy jeńimpazy Erasyl Qajybaev pen týrnırdiń qola júldegeri Saıat Shámshıevti arnaıy qabyldady. Kezdesýde óńir basshysy aımaq abyroıyn asyrǵan balýandarǵa alǵys bildirip, olardyń jeńisi tek sporttyq jetistik qana emes, jastardy otanshyldyqqa, salamatty ómirge baýlıtyn laıyqty úlgi ekenin erekshe atap ótti. Ulttyq sportty damytýǵa, nasıhattaýǵa qosqan úlesi úshin demeýshiler atynan qos sportshyǵa temir tulpar tabystaldy. Sondaı-aq bıylǵy «Qazaqstan barysy» Erasyl Qajybaev úsh bólmeli páterdiń sertıfıkatyna ıe boldy.
Jankúıerlerge sambo, dzıýdo kúresi arqyly jaqsy tanymal E.Qajybaev halyqaralyq arenalarda da aıtarlyqtaı jetistikterge jetken. Ol – dzıýdodan kadetter men jastar arasyndaǵy el chempıonatynyń júldegeri, Djakartadaǵy Azııa oıyndarynyń komandalyq jarysynyń kúmkis medal ıegeri, sambodan Azııa chempıony, álem chempıonatynyń qola júldegeri.
«Men bul týrnırge altynshy ret qatysyp otyrmyn. Jeńisimdi týǵan jerime, jerlesterime arnaımyn. Aldaǵy alaman jarystarǵa da tyńǵylyqty daıyndalyp, el senimin aqtaýǵa tyrysamyn», dedi E.Qajybaev.
Týrnırdiń qola júldegeri, «Bolatshy» laqap atymen óner kórsetken Saıat Shámshıev te belgili balýan, halyqaralyq dárejedegi sport sheberi, dzıýdodan elimizdiń chempıony, sambodan álem chempıonatynyń qola júldegeri.
SEMEI