Qarashanyń basynda Almaty oblysynyń Eńbekshiqazaq aýdany Sógeti aýyldyq okrýgi aýmaǵynda volframdy qaıta óńdeıtin elimizdegi alǵashqy zaýyt iske qosyldy. Zaýyttyń iske qosylýy – taý-ken óndirisiniń damýy jolyndaǵy úlken qadam ári elimizdiń halyqaralyq deńgeıde básekege qabilettiligin arttyrýdaǵy aıryqsha bastama. Tarıhı oqıǵa elimizdiń álemdik sırek metaldar naryǵyndaǵy ornyn nyǵaıtýmen qatar, tabıǵı resýrstardy tıimdi paıdalaný men óńdeýde jańa múmkindikterge jol ashpaq.
Jobany tolyqtaı Gonkongte ornalasqan «Jiaxin International Resources Investment Ltd» kompanııasy qarjylandyrǵan. Zaýyt jylyna 3,3 mln tonna ken óńdeıdi. Jalpy quny – 300 mln dollar.
«Bárińizdi eki memleket arasyndaǵy yntymaqtastyq nátıjesinde iske asyrylyp otyrǵan «Volfram kenderin óndirý jáne qaıta óńdeý zaýytynyń» ashylýymen quttyqtaımyn. Jańa kásiporynnyń iske qosylýy – aýdanymyzda jańa jumys orny ashylyp, ekonomıka damyp, áleýmettik turaqtylyq nyǵaıady degendi bildiredi. Memlekettiń shetel ınvestorlaryn qoldaýy nátıjesinde aýdanymyzǵa 2024 jyldyń 9 aıynda 84 mlrd teńge kóleminde (2023 jyly 9 aıda 62 mlrd teńge tartylǵan) ınvestısııa tartyldy. Otandyq bıznestiń shetel ınvestorlaryna senimdi seriktes bolýyna barlyq jaǵdaı jasalyp otyr. Kásiporyn aımaǵymyzdyń áleýetin arttyryp, turǵyndardyń ál-aýqatyn jaqsartýǵa úlken úles qosady dep senemin», dedi aýdan ákimi Talǵat Baıedilov.
Búginde Eńbekshiqazaq aýdanynda boıynsha shaǵyn jáne orta kásiporyn sany 26 myń birlikti qurap, 40 myńnan asa adamdy jumyspen qamtydy. Onyń ishinde 106 birlik ónerkásip oryny jumys júrgizip, ónerkásip kólemi bıylǵy 9 aıda 72 mlrd teńgeni qurady.
Jańa zaýyt halyqaralyq ekologııalyq jáne óndiristik standarttardy eskere otyryp jumys isteıdi. Qazirgi ýaqytta zaýyttyń negizgi nysandary – shlam saqtaý oryndary men taý-ken baıytý fabrıkasy 60 paıyzǵa, syrtqy sý tartý jumystary 85 paıyzǵa, syrtqy elektrmen jabdyqtaý 100 paıyzǵa jáne ishki elektrmen jabdyqtaý 90 paıyzǵa aıaqtalǵan. Bul kórsetkishter jobanyń tehnıkalyq jáne óndiristik úderisiniń joǵary sapada iske asyrylyp jatqanyn dáleldeıdi. Tarıhı jobany «Aral Kegen» JShS basqarady, al onyń aksıonerleri halyqaralyq holdıng «Jiaxin International Resources Investment Ltd.» quramyna kiredi, oǵan «Jiangxi Copper Corporation», «China Railway Construction Company», «China Civil Engineering Construction Company» jáne «Ever Trillion International Singapore PTE LTD» kompanııalary qosylǵan.
Aldaǵy ýaqytta volfram mólsherin 88,5 paıyzǵa deıin jetkizý, joǵary tazalyqtaǵy volfram karbıdin shyǵarý maqsatynda tereń qaıta óńdeý keshenin salý josparlanǵan. Bul kezeńge arnalǵan ınvestısııa kólemi – 150 mln dollar.
Zaýyttyń ashylýy elimizdiń taý-ken ónerkásibinde jańa kezeńdi bastaıdy. Qazir álemde volframǵa suranys artqan saıyn, onyń óndirilýi men óńdelýi de erekshe mańyzǵa ıe bolyp tur. Bizdiń el bul jobamen tek óziniń tabıǵı resýrstaryn tıimdi paıdalanýdy kózdep qana qoımaı, álemdik naryqta jetekshi orynǵa shyǵýdy da josparlaıdy.
Almaty oblysy