Máslıhattar ýaqytpen birge tynystaıdy

Elimizdiń memlekettik bıliginde jergilikti ókiletti organdar – máslıhattar mańyzdy oryn alady. 1994 jyly naýryz aıynda elimizdiń barlyq aımaǵy sekildi Qostanaı oblysynda da máslıhattardyń alǵashqy uıymdastyrý sessııalary ótip, depýtattar iske kirisken bolatyn. Sodan beri oblystaǵy máslı­hattar jergilikti atqarýshy bılikpen tize qosyp, óńirdegi kúr­deli máselelerdi birge sheship keledi. Oblystyń ekonomıka­lyq-áleýmettik damýyndaǵy ın­no­vasııalyq-ınvestısııa­lyq jáne áleýmettik salalarda­­ǵy mem­lekettik baǵdarlamalar­dyń jú­ze­ge asýyna máslıhat­tar yqpa­ly úlken. Jaqynda Qostanaı oblystyq máslıhatynyń hatshysy Saı­laýbek Esjanov oblystyq baspasóz klýbynda jýrnalısterdiń su­raqtaryna jaýap berdi. Oblystaǵy máslıhattarda 300-den asa, al oblystyq máslıhatta 36 depýtat bar. Olar ǵylymdaǵy, aýyl sharýashylyǵy men óndiristegi, bilim berý, densaýlyq saqtaý, mádenıet salalaryndaǵy jaýapty qyzmetimen qatar, máslıhat jumysyn qoǵamdyq negizde atqarady. Oblystyq máslıhattaǵy alty turaqty komıssııa negizinen bıýdjet jáne áleýmettik saladaǵy túrli máselelerdi taldap, baǵyttap otyrady. Saılaýbek Erǵazyuly ­jýrnalıstermen kezdesýinde kóbine turǵyndar arasynda pikirtalas týdyratyn máselelerge toqtaldy. Solardyń biri – ono­mastıka máselesi, ádette, jurt­shylyqtyń nazaryn kóbirek aýdarady. Oblystyq máslıhat hatshysy suraqqa sáıkes jaýap bere kelip, kóshe, eldi mekender atyn óz­gertý daǵdarys kezinde ýaqytsha keıingi shegerile turatynyn aıtty. Qazir kópshilikti ıdeologııalyq emes, ekonomıkalyq máseleler kóbi­rek oılantýǵa tıis. О́ıtkeni, munyń barlyǵy da qarjyny talap etedi. – Kósheniń, eldi mekenniń atyn ózgertý, belgili tulǵalarymyzdyń esimin qalypqa keltirý, máńgi este qaldyrý sekildi máseleler máslıhattarǵa túsedi. Árıne, munyń barlyǵy da kerek. Alaıda, depýtattar bul máseleni 2-3 jylǵa keıinge ysyra turady. Sebebi, daǵdarys – ýaqytsha qu­bylys, ol ótedi. Ekonomıka jaq­saryp, ­bıýdjet qalpyna kelgen kezde qajet dep tabylǵan ataýlardy ózger­tý qashpaıdy, – dedi. Saılaýbek Esjanov. Sonymen qatar, Saılaýbek Erǵazyuly oblys bıýdjetiniń qysqaratynyn eske saldy. Etek-jeńimizdi jınap, kórpege qaraı kósilip, birdi ekeý etip únemdegende ǵana álemdi sharpyp otyrǵan daǵdarysqa qarsy turýǵa bolady. Áleýmettik baǵdarlamalar bar múmkindiginshe júrgiziletin bolady. Biraq keıbir jobalarǵa qarjy shekteledi. Máslıhat hatshysy aýyldyq okrýgter ákimderiniń bıýdjeti, óńirde týrızmdi damytý, oblystyq depýtattar jumystary, tegin dári-dármek sekildi áleýmettik qajetterge bıýdjetten bólinetin qarjy, máslıhattyń búgingi tynysy týraly da suraqtarǵa jaýap berdi. – Depýtattar bıýdjet qar­jysynyń tıimdi ári oryndy jumsalýyna asa mán beredi. Tipti, jergilikti atqarýshy bılikpen osy jóninde kelispeıtin kezder de kezdesedi. Mysaly, qaısybir jyly «Lesnaıa skazka» demalys lagerin jóndeýge bıýdjetten bólinetin qarjyny ýaqytsha toqtatqany bar. Sebebi, kishkentaı ǵana lagerdi qalpyna keltirýge bıýdjetten mol qarjy jumsaýdy depýtattar qısynsyz dep sheshti. Olardyń barlyǵy da maman, isker jandar ǵoı, ekonomıkalyq máselelerdi jaqsy bilgennen keıin ár nárseniń retin de oryndy qozǵaıdy, – dedi oblystyq máslıhat hatshysy S.Esjanov. Sondyqtan máslıhattarǵa halyq senedi. Názıra JÁRIMBETOVA, «Egemen Qazaqstan». QOSTANAI.