Elimizdiń hor óneriniń damýyna eleýli úles qosqan KSRO Halyq ártisi Anatolıı Molodovtyń 95 jyldyǵyna oraı Jambyl atyndaǵy Qazaq memlekettik akademııalyq fılarmonııasynda konsert-festıval ótti. Osy oraıda E.Rahmadıev atyndaǵy Memlekettik akademııalyq fılarmonııanyń Kameralyq hory Almatyda óz ónerin kórsetti.
Qazaq KSR Memlekettik hor kapellasynyń repertýarynda Anatolıı Molodovtyń jetekshiligimen Qazaqstan kompozıtorlarynyń kóptegen kantatalary men oratorııalary paıda boldy. Atap aıtsaq, Muqan Tólebaev, Ǵazıza Jubanova, Erkeǵalı Rahmadıev, Sydyq Muhamedjanov, Bazarbaı Jumanııazov, Mansur Saǵatov, t.b. bar. Klassıkalyq mýzyka V.A.Mosart, Dj. Verdı, G.Fore rekvıemderi, L.Bethovenniń «9-sımfonııasy», N.Iomellıdiń «Mızerere», S.V.Rahmanınovtiń «Vesna», «Lıtýrgııa», «Vsenoshnoe bdenıe» sııaqty shyǵarmalarmen tolyqty. Molodov qazaq jáne orys halyq ánderin, aralas hor men balalar hor ujymdaryna arnalǵan ulttyq kompoıtorlardyń shyǵarmalaryn óńdedi.
Anatolıı Molodovtyń kóptegen shákirtteri men izbasarlary ustazdaryn eske alyp, óz shyǵarmalaryn arnady. Hormeısterdi eske alý konsert-festıvali Almaty fılarmonııasynyń sahnasynda Baqytjan Baıqadamov atyndaǵy Memlekettik hor kapellasy, E.Rahmadıev atyndaǵy Astana qalasynyń Memlekettik akademııalyq fılarmonııasynyń kameralyq hory, Qurmanǵazy atyndaǵy Qazaq ulttyq konservatorııasynyń aralas hory jáne Almaty qalasyndaǵy №79 mektep-gımnazııasynyń «Báıterek» balalar hory sııaqty ujymdardyń basyn qosty.
Kesh barysynda hor ujymdarynyń kórkemdik jetekshileri jáne bas dırıjerleri – Qazaqstannyń eńbek sińirgen qaıratkerleri Gúlmıra Quttybadamova men Beıimbet Demeýov, Elena Baıysbaeva jáne Iаn Rýdkovskıı onyń hor ónerin damytý jolyndaǵy eńbegi týraly estelikterimen bólisti.
«Anatolıı Vasılevıch – qazaq hor ónerin jańa sapaly deńgeıge kótergen alǵashqy hor dırıjeri. Onyń shákirt tárbıeleýdegi ádisteri árqaısymyzdyń esimizde. Solfedjıonyń vokaldyq jáne hor mádenıeti boıynsha sabaqtary kúndelikti kapellada ótkizildi. Osynyń arqasynda kapella úlken ujym retinde qalyptasty. Ol Qazaqstan kompozıtorlarynyń shyǵarmashylyq zerthanasy, respýblıkada ǵana emes, búkil keńes odaǵynda tanylǵan kantatalar, oratorııalar, hor sıýıtalary men mınıatıýralardyń alǵashqy oryndaýshysy boldy», dedi G.Quttybadamova.
Astanadan arnaıy kelgen E.Rahmadıev atyndaǵy Memlekettik akademııalyq fılarmonııanyń kameralyq hory A.Molodovtyń horǵa óńdegen «Arys jaǵasynda» (áni Sh.Qaldaıaqov, sózi M.Shahanov), «Proshanıe» (áni Ǵ.Jubanova, sózi M.Svetaeva) «Qarlyǵash» (áni A.Jubanov, sózi I.Mataqov), «Byvaıse zdorovy» (áni M.Lıýbana, sózi A.Rýsak) shyǵarmalaryn sheber oryndady.