Almaty kópsalaly kolledjiniń bazasynda jas mamandardyń sheberligin shyńdaıtyn qaladaǵy toǵyzynshy quzyrettilik ortalyǵy ashyldy. Mansap alańynda stýdentter tońazytqyshtar men avtomobılderdi jóndeý, qyzmet kórsetý, jıhaz óndirisi, IT-dızaın boıynsha tórt baǵytta bilim alady.
Stýdentter oqý barysynda úırengenin tájirıbe júzinde kórsetip, óz betinshe jıhaz jasap, mashına bólshekterin qurastyryp, sáýlet jáne dızaınmen aınalysa alady. Sondaı-aq ortalyqta sala mamandary taǵylymdamadan ótip, biliktiligin shyńdaıdy.
Almaty kópsalaly kolledjiniń dırektory Asylhan Beısetbaev bıznes-ınkýbator jáne strategııalyq josparymen tanystyrdy. Stýdentter óz jobalaryn ázirlep, tálimgerlerden sabaq alyp, ınvestısııa tartýǵa múmkindik alatynyn atap ótti. Onyń aıtýynsha, quzyrettilik ortalyǵy bolashaqta stýdentterdiń bilimin kúsheıtýge jáne tájirıbe jınaýǵa, mamandyq boıynsha qalalyq, respýblıkalyq, halyqaralyq «WorldSkills» chempıonatyna daıyndyqtan ótýge múmkindik beredi. Búginde kolledjde joǵary bilikti mamandardy daıarlaýǵa barlyq qajetti resýrs bar. Árıne, bilim berý sapasy birinshi kezekte kolledj oqytýshylarynyń biliktiligine baılanysty desek, munda óz isin jaqsy kóretin jáne kásibı deńgeıin únemi arttyryp otyratyn bilikti oqytýshylar men óndiristik oqytý sheberleri jumys isteıdi. 80 jyldyq tarıhy bar kolledjde tek kásibı daıyndyqqa ǵana emes, jeke tulǵany damytý men kóshbasshylyq qasıetterin ashý úshin de barlyq jaǵdaı jasalǵan.
Quzyrettilik ortalyǵy ashylǵaly tájirıbeli oqytýshylardyń úıretýiniń nátıjesinde sýret salýǵa, kompıýterden logotıp, sertıfıkat jasaýǵa múmkindik alǵanyn atap ótken kolledj stýdenti Oljas Maılybaı aldaǵy ýaqytta osy salada kásibı mashyǵyn damyta beretinin aıtty.
Osy joly mamandyǵy boıynsha sheberligin dáleldep, «Úzdik medalon» ıegerleri atanǵan stýdentterdi qala ákimdigi quttyqtady. Is-shara aıasynda joǵary kásibılik kórsetip, Fransııada jas mamandar arasyndaǵy «WorldSkills International»-da júldeli oryndarmen oralǵan 9 stýdent marapattaldy.
«Worldskills international» júldegeri Mıhaıl Popov gıpsokartonmen jumys isteıtin qurylys salasyna mamandanǵan. Ol «Worldskills international» baıqaýyna qatysyp, álem elderinen jınalǵan jas sheberlermen birge saıysqa túsip, jeńimpaz atanǵan bolatyn. Endigi kezekte bul baǵyttaǵy sheberligin shyńdaı beretinin aıtty.
Ońtústik astanada buǵan deıin ashylǵan segiz mansap ortalyǵynda stýdentter men pedagogterge arnalǵan oqý-óndiristik sabaqtar, kásibı jáne men sheberlik synyptary, sondaı-aq «WorldSkills Kazakhstan» jáne «WorldSkills Almaty» chempıonattaryna daıyndyq jattyǵýy ótip jatyr. Bul ortalyqtar barlyq múddeli taraptar, sonyń ishinde kolledjderge ınvestısııa salatyn jumys berýshiler arasyndaǵy dıalogtiń damýyna yqpal etedi. Akademııalyq utqyrlyq jobalary jáne bıznes sarapshylarynyń qatysýymen ótetin demonstrasııalyq emtıhandar túlekterge eńbek naryǵyna nyq senimmen shyǵýǵa múmkindik beredi. Mundaı quzyrettilik ortalyqtary bilim sapasyn arttyryp, tehnıkalyq kásiptik bilim berý júıesin damytyp qana qoımaı, jumysshy mamandyqtarynyń bedelin arttyrýǵa yqpal eteri anyq.
ALMATY