Mádenıet jáne aqparat mınıstri Aıda Balaeva depýtattarǵa Memleket basshysynyń 2022 jylǵy 13 sáýirdegi «Memlekettik apparattyń qyzmetin bıýrokratııadan aryltý sharalary týraly» Jarlyǵyna sáıkes aqparat, qoǵamdyq damý, mádenıet jáne arhıv salasyndaǵy birqatar zańdarǵa ózgeris engizýdi usyndy, dep habarlaıdy Egemen.kz.
Mınıstr sóz kezeginde zań jobasy negizdemelik sıpattaǵy 3 úlken baǵytty qamtıtynyn atap ótti.
«Birinshi, salany retteıtin uzyn sany 9 zańǵa ózgerister engizip, osyǵan oraı olardyń maqsatyn, mindetteri men prınsıpterin qaıta anyqtaıdy.
Ekinshi, zań jobasy mınıstrliktiń quzyretin zańnamalyq turǵydan shamadan tys retteý máselesin sheshedi. Atap aıtqanda, buryn zańnamaǵa siltenetin mınıstrliktiń moınyndaǵy tól mindetterdi, sonyń ishinde ishki prosedýralarǵa jáne basqa memlekettik organdarmen qarym-qatynas máselelerine qatysty normalar endigi jerde mınıstrliktiń Erejesimen retteletin bolady.
Úshinshi, Memleket basshysy ótken jylǵy Joldaýynda kreatıvti ındýstrııa ókilderine memlekettik qoldaý sharalaryn qarystyrýdy tapsyrǵan edi. Mine, osy turǵyda usynylyp otyrǵan zań jobasy kreatıvti óndiristi qoldaýdyń naqty sharalaryn kózdeıtin memlekettik saıasatty anyqtaıtyn ózgeristerdi usynady. Máselen, Úkimetke osy saıasatty júrgizý jáne osy salany damytýǵa jaýapty zańdy tulǵalardy anyqtaý sııaqty naqty quzyret berýdi kózdeıdi», dedi Aıda Balaeva.
Sóz sońynda A.Balaeva bolashaq zańnama el Prezıdentiniń bılik aldyna qoıǵan tapsyrmalaryn tolyq oryndap, onyń osy baǵyttaǵy qyzmet júıesin edáýir jaqsartýǵa baǵyttalǵanyn túsindirip, depýttardan qoldaý kútetinin jetkizdi.